२५९. तिरीटवच्छजातकं (३-१-९)

२५. नयिमस्स विज्जामयमत्थि किञ्चि, न बन्धवो नो पन ते सहायो;

अथ केन वण्णेन तिरीटवच्छो [तिरीटिवच्छो (स्या. क.)], तेदण्डिको भुञ्जति अग्गपिण्डं.

२६. आपासु [आवासु (क.)] मे युद्धपराजितस्स, एकस्स कत्वा विवनस्मि घोरे;

पसारयी किच्छगतस्स पाणिं, तेनूदतारिं दुखसंपरेतो.

२७. एतस्स किच्चेन इधानुपत्तो, वेसायिनो विसया जीवलोके;

लाभारहो तात तिरीटवच्छो, देथस्स भोगं यजथञ्च [यजतञ्च (सी. पी.), यजितञ्च (स्या.)] यञ्ञन्ति.

तिरीटवच्छजातकं नवमं.