९. उपाहनवग्गो

२३१. उपाहनजातकं (२-९-१)

१६१. यथापि कीता पुरिसस्सुपाहना, सुखस्स अत्थाय दुखं उदब्बहे;

घम्माभितत्ता थलसा पपीळिता, तस्सेव पादे पुरिसस्स खादरे.

१६२. एवमेव यो दुक्कुलीनो अनरियो, तम्माक [तम्हाक (सी.), तुम्हाक (स्या. पी.)] विज्जञ्च सुतञ्च आदिय;

तमेव सो तत्थ सुतेन खादति, अनरियो वुच्चति दुपाहनूपमोति [पानदूपमोति (सी. पी.)].

उपाहनजातकं पठमं.

२३२. वीणागुणजातकं (२-९-२)

१६३. एकचिन्तितो यमत्थो, बालो अपरिणायको;

न हि खुज्जेन वामेन, भोति सङ्गन्तुमरहसि.

१६४. पुरिसूसभं मञ्ञमाना, अहं खुज्जमकामयिं;

सोयं संकुटितो सेति, छिन्नतन्ति यथा विणाति [थुणाति (सी.)].

वीणागुणजातकं दुतियं.

२३३. विकण्णजातकं (२-९-३)

१६५. कामं यहिं इच्छसि तेन गच्छ, विद्धोसि मम्मम्हि [ममस्मि (क.)] विकण्णकेन;

हतोसि भत्तेन सुवादितेन [सवादितेन (सी. स्या. पी.)], लोलो च मच्छे अनुबन्धमानो.

१६६. एवम्पि लोकामिसं ओपतन्तो, विहञ्ञती चित्तवसानुवत्ती;

सो हञ्ञति ञातिसखान मज्झे, मच्छानुगो सोरिव सुंसुमारोति [सुसुमारो (क.)].

विकण्णजातकं ततियं.

२३४. असिताभूजातकं (२-९-४)

१६७. त्वमेव दानिमकर [मकरि (स्या.), मकरा (क. सी.)], यं कामो ब्यगमा तयि;

सोयं अप्पटिसन्धिको, खरछिन्नंव रेनुकं [रेरुकं (सी. पी.)].

१६८. अत्रिच्छं [अत्रिच्छा (सी. स्या. पी.)] अतिलोभेन, अतिलोभमदेन च;

एवं हायति अत्थम्हा, अहंव असिताभुयाति.

असिताभूजातकं चतुत्थं.

२३५. वच्छनखजातकं (२-९-५)

१६९. सुखा घरा वच्छनख, सहिरञ्ञा सभोजना;

यत्थ भुत्वा पिवित्वा च, सयेय्याथ अनुस्सुको.

१७०. घरा नानीहमानस्स, घरा नाभणतो मुसा;

घरा नादिन्नदण्डस्स, परेसं अनिकुब्बतो [अनिक्रुब्बतो (क.)];

एवं छिद्दं दुरभिसम्भवं [दुरभिभवं (सी. पी.)], को घरं पटिपज्जतीति.

वच्छनखजातकं पञ्चमं.

२३६. बकजातकं (२-९-६)

१७१. भद्दको वतयं पक्खी, दिजो कुमुदसन्निभो;

वूपसन्तेहि पक्खेहि, मन्दमन्दोव झायति.

१७२. नास्स सीलं विजानाथ, अनञ्ञाय पसंसथ;

अम्हे दिजो न पालेति, तेन पक्खी न फन्दतीति.

बकजातकं छट्ठं.

२३७. साकेतजातकं (२-९-७)

१७३. को नु खो भगवा हेतु, एकच्चे इध पुग्गले;

अतीव हदयं निब्बाति, चित्तञ्चापि पसीदति.

१७४. पुब्बेव सन्निवासेन, पच्चुप्पन्नहितेन वा;

एवं तं जायते पेमं, उप्पलंव यथोदकेति.

साकेतजातकं सत्तमं.

२३८. एकपदजातकं (२-९-८)

१७५. इङ्घ एकपदं तात, अनेकत्थपदस्सितं [पदनिस्सितं (सी. पी.)];

किञ्चि सङ्गाहिकं ब्रूसि, येनत्थे साधयेमसे.

१७६. दक्खेय्येकपदं तात, अनेकत्थपदस्सितं;

तञ्च सीलेन सञ्ञुत्तं, खन्तिया उपपादितं;

अलं मित्ते सुखापेतुं, अमित्तानं दुखाय चाति.

एकपदजातकं अट्ठमं.

२३९. हरितमण्डूकजातकं (२-९-९)

१७७. आसीविसम्पि मं [आसीविसं ममं (सी. पी.)] सन्तं, पविट्ठं कुमिनामुखं;

रुच्चते हरितामाता, यं मं खादन्ति मच्छका.

१७८. विलुम्पतेव पुरिसो, यावस्स उपकप्पति;

यदा चञ्ञे विलुम्पन्ति, सो विलुत्तो विलुम्पतीति [विलुप्पतीति (?)].

हरितमण्डूकजातकं नवमं.

२४०. महापिङ्गलजातकं (२-९-१०)

१७९. सब्बो जनो हिंसितो पिङ्गलेन, तस्मिं मते पच्चया [पच्चयं (सी. स्या. पी.)] वेदयन्ति;

पियो नु ते आसि अकण्हनेत्तो, कस्मा नु त्वं रोदसि द्वारपाल.

१८०. न मे पियो आसि अकण्हनेत्तो, भायामि पच्चागमनाय तस्स;

इतो गतो हिंसेय्य मच्चुराजं, सो हिंसितो आनेय्य पुन इध.

१८१. दड्ढो वाहसहस्सेहि, सित्तो घटसतेहि सो;

परिक्खता च सा भूमि, मा भायि नागमिस्सतीति.

महापिङ्गलजातकं दसमं.

उपाहनवग्गो नवमो.

तस्सुद्दानं –

वरुपाहन खुज्ज विकण्णकको, असिताभुय पञ्चमवच्छनखो;

दिज पेमवरुत्तमएकपदं, कुमिनामुख पिङ्गलकेन दसाति.