८. कासाववग्गो

२२१. कासावजातकं (२-८-१)

१४१. अनिक्कसावो कासावं, यो वत्थं परिदहिस्सति [परिदहेस्सति (सी. पी.)];

अपेतो दमसच्चेन, न सो कासावमरहति.

१४२. यो च वन्तकसावस्स, सीलेसु सुसमाहितो;

उपेतो दमसच्चेन, स वे कासावमरहतीति.

कासावजातकं पठमं.

२२२. चूळनन्दियजातकं (२-८-२)

१४३. इदं तदाचरियवचो, पारासरियो यदब्रवि [पोराणाचरियोब्रवि (क.)];

मासु त्वं अकरि [अकरा (सी. पी.)] पापं, यं त्वं पच्छा कतं तपे.

१४४. यानि करोति पुरिसो, तानि अत्तनि पस्सति;

कल्याणकारी कल्याणं, पापकारी च पापकं;

यादिसं वपते बीजं, तादिसं हरते फलन्ति.

चूळनन्दियजातकं दुतियं.

२२३. पुटभत्तजातकं (२-८-३)

१४५. नमे नमन्तस्स भजे भजन्तं, किच्चानुकुब्बस्स करेय्य किच्चं;

नानत्थकामस्स करेय्य अत्थं, असम्भजन्तम्पि न सम्भजेय्य.

१४६. चजे चजन्तं वनथं न कयिरा, अपेतचित्तेन न सम्भजेय्य;

दिजो दुमं खीणफलन्ति ञत्वा, अञ्ञं समेक्खेय्य महा हि लोकोति.

पुटभत्तजातकं ततियं.

२२४. कुम्भिलजातकं (२-८-४)

१४७. यस्सेते चतुरो धम्मा, वानरिन्द यथा तव;

सच्चं धम्मो धिति चागो, दिट्ठं सो अतिवत्तति.

१४८. यस्स चेते न विज्जन्ति, गुणा परमभद्दका;

सच्चं धम्मो धिति चागो, दिट्ठं सो नातिवत्ततीति.

कुम्भिलजातकं चतुत्थं.

२२५. खन्तिवण्णजातकं (२-८-५)

१४९. अत्थि मे पुरिसो देव, सब्बकिच्चेसु ब्यावटो [वावटो (क.)];

तस्स चेकोपराधत्थि, तत्थ त्वं किन्ति मञ्ञसि.

१५०. अम्हाकम्पत्थि पुरिसो, एदिसो इध विज्जति;

दुल्लभो अङ्गसम्पन्नो, खन्तिरस्माक रुच्चतीति.

खन्तिवण्णजातकं पञ्चमं.

२२६. कोसियजातकं (२-८-६)

१५१. काले निक्खमना साधु, नाकाले साधु निक्खमो;

अकालेन हि निक्खम्म, एककम्पि बहुज्जनो;

न किञ्चि अत्थं जोतेति, धङ्कसेनाव कोसियं.

१५२. धीरो च विधिविधानञ्ञू, परेसं विवरानुगू;

सब्बामित्ते वसीकत्वा, कोसियोव सुखी सियाति.

कोसियजातकं छट्ठं.

२२७. गूथपाणजातकं (२-८-७)

१५३. सूरो सूरेन सङ्गम्म, विक्कन्तेन पहारिना;

एहि नाग निवत्तस्सु, किं नु भीतो पलायसि;

पस्सन्तु अङ्गमगधा, मम तुय्हञ्च विक्कमं.

१५४. न तं पादा वधिस्सामि, न दन्तेहि न सोण्डिया;

मीळ्हेन तं वधिस्सामि, पूति हञ्ञतु पूतिनाति.

गूथपाणजातकं सत्तमं.

२२८. कामनीतजातकं (२-८-८)

१५५. तयो गिरिं अन्तरं कामयामि, पञ्चाला कुरुयो केकके च [कुरयो केकये च (सी.)];

ततुत्तरिं [तदुत्तरिं (क.)] ब्राह्मण कामयामि, तिकिच्छ मं ब्राह्मण कामनीतं.

१५६. कण्हाहिदट्ठस्स करोन्ति हेके, अमनुस्सपविट्ठस्स [अमनुस्सवद्धस्स (सी. पी.), अमनुस्सविट्ठस्स (स्या.)] करोन्ति पण्डिता;

न कामनीतस्स करोति कोचि, ओक्कन्तसुक्कस्स हि का तिकिच्छाति.

कामनीतजातकं अट्ठमं.

२२९. पलायितजातकं (२-८-९)

१५७. गजग्गमेघेहि हयग्गमालिभि, रथूमिजातेहि सराभिवस्सेभि [सराभिवस्सभि (स्या. सी. अट्ठ.), सराभिवस्सिभि (?)];

थरुग्गहावट्ट [धनुग्गहावट्ट (क.)] दळ्हप्पहारिभि, परिवारिता तक्कसिला समन्ततो.

१५८. [अभिधावथा च पतथा च, विविधविनदिता च दन्तिभि; वत्ततज्ज तुमुलो घोसो, यथा विज्जुता जलधरस्स गज्जतोति; (सी. पी. क.)] अभिधावथ चूपधावथ च [अभिधावथा चुप्पतथा च (स्या.)], विविधा विनादिता [विनादितत्थ (क.)] वदन्तिभि;

वत्ततज्ज तुमुलो घोसो यथा, विज्जुलता जलधरस्स गज्जतोति [अभिधावथा च पतथा च, विविधविनदिता च दन्तिभि; वत्ततज्ज तुमुलो घोसो, यथा विज्जुता जलधरस्स गज्जतोति; (सी. पी. क.)].

पलायितजातकं नवमं.

२३०. दुतियपलायितजातकं (२-८-१०)

१५९. धजमपरिमितं अनन्तपारं, दुप्पसहंधङ्केहि सागरंव [सागरमिव (सी. स्या. पी.)];

गिरिमिवअनिलेन दुप्पसय्हो [दुप्पसहो (सी. पी. क.)], दुप्पसहो अहमज्जतादिसेन.

१६०. मा बालियं विलपि [विप्पलपि (बहूसु)] न हिस्स तादिसं, विडय्हसे [विळय्हसे (सी. पी.)] न हि लभसे निसेधकं;

आसज्जसि गजमिव एकचारिनं, यो तं पदा नळमिव पोथयिस्सतीति.

दुतियपलायितजातकं दसमं.

कासाववग्गो अट्ठमो.

तस्सुद्दानं –

वरवत्थवचो दुमखीणफलं, चतुरोधम्मवरं पुरिसुत्तम;

धङ्कमगधा च तयोगिरिनाम, गजग्गवरो धजवरेन दसाति.