४. असदिसवग्गो

१८१. असदिसजातकं (२-४-१)

६१. धनुग्गहो असदिसो, राजपुत्तो महब्बलो;

दूरेपाती अक्खणवेधी, महाकायप्पदालनो.

६२. सब्बामित्ते रणं कत्वा, न च कञ्चि विहेठयि;

भातरं सोत्थिं कत्वान, संयमं अज्झुपागमीति.

असदिसजातकं पठमं.

१८२. सङ्गामावचरजातकं (२-४-२)

६३. सङ्गामावचरो सूरो, बलवा इति विस्सुतो;

किं नु तोरणमासज्ज, पटिक्कमसि कुञ्जर.

६४. ओमद्द खिप्पं पलिघं, एसिकानि च अब्बह [उब्बह (स्या.), अब्भुह (क.)];

तोरणानि च मद्दित्वा, खिप्पं पविस कुञ्जराति.

सङ्गामावचरजातकं दुतियं.

१८३. वालोदकजातकं (२-४-३)

६५. वालोदकं अप्परसं निहीनं, पित्वा [पीत्वा (सी. पी.)] मदो जायति गद्रभानं;

इमञ्च पित्वान रसं पणीतं, मदो न सञ्जायति सिन्धवानं.

६६. अप्पं पिवित्वान निहीनजच्चो, सो मज्जती तेन जनिन्द पुट्ठो [फुट्ठो (सी. स्या.), मुट्ठो (क.)];

धोरय्हसीली च कुलम्हि जातो, न मज्जती अग्गरसं पिवित्वाति.

वालोदकजातकं ततियं.

१८४. गिरिदत्तजातकं (२-४-४)

६७. दूसितो गिरिदत्तेन [गिरिदन्तेन (पी.)], हयो सामस्स पण्डवो;

पोराणं पकतिं हित्वा, तस्सेवानुविधिय्यति [नुविधीयति (सी. पी.)].

६८. सचे च तनुजो पोसो, सिखराकार [सिङ्गाराकार (स्या.)] कप्पितो;

आनने नं [तं (सी. स्या. पी.)] गहेत्वान, मण्डले परिवत्तये;

खिप्पमेव पहन्त्वान, तस्सेवानुविधिय्यतीति.

गिरिदत्तजातकं चतुत्थं.

१८५. अनभिरतिजातकं (२-४-५)

६९. यथोदके आविले अप्पसन्ने, न पस्सति सिप्पिकसम्बुकञ्च;

सक्खरं वालुकं मच्छगुम्बं, एवं आविलम्हि [आविले हि (सी.)] चित्ते;

न पस्सति अत्तदत्थं परत्थं.

७०. यथोदके अच्छे विप्पसन्ने, सो पस्सति सिप्पिकसम्बुकञ्च;

सक्खरं वालुकं मच्छगुम्बं, एवं अनाविलम्हि चित्ते;

सो पस्सति अत्तदत्थं परत्थन्ति.

अनभिरतिजातकं पञ्चमं.

१८६. दधिवाहनजातकं (२-४-६)

७१. वण्णगन्धरसूपेतो, अम्बोयं अहुवा पुरे;

तमेव पूजं लभमानो, केनम्बो कटुकप्फलो.

७२. पुचिमन्दपरिवारो, अम्बो ते दधिवाहन;

मूलं मूलेन संसट्ठं, साखा साखा [साखं (स्या. क.)] निसेवरे [निवीसरे (क.)];

असातसन्निवासेन, तेनम्बो कटुकप्फलोति.

दधिवाहनजातकं छट्ठं.

१८७. चतुमट्ठजातकं (२-४-७)

७३. उच्चे विटभिमारुय्ह, मन्तयव्हो रहोगता;

नीचे ओरुय्ह मन्तव्हो, मिगराजापि सोस्सति.

७४. यं सुवण्णो सुवण्णेन [यं सुपण्णो सुपण्णेन (सी. स्या. पी.)], देवो देवेन मन्तये;

किं तेत्थ चतुमट्ठस्स, बिलं पविस जम्बुकाति.

चतुमट्ठजातकं सत्तमं.

१८८. सीहकोत्थुजातकं (२-४-८)

७५. सीहङ्गुली सीहनखो, सीहपादपतिट्ठितो;

सो सीहो सीहसङ्घम्हि, एको नदति अञ्ञथा.

७६. मा त्वं नदि राजपुत्त, अप्पसद्दो वने वस;

सरेन खो [मा (क.)] तं जानेय्युं, न हि ते पेत्तिको सरोति.

सीहकोत्थुजातकं अट्ठमं.

१८९. सीहचम्मजातकं (२-४-९)

७७. नेतं सीहस्स नदितं, न ब्यग्घस्स न [ब्यग्घस्स न च (क.)] दीपिनो;

पारुतो सीहचम्मेन, जम्मो नदति गद्रभो.

७८. चिरम्पि खो तं खादेय्य, गद्रभो हरितं यवं;

पारुतो सीहचम्मेन, रवमानोव दूसयीति.

सीहचम्मजातकं नवमं.

१९०. सीलानिसंसजातकं (२-४-१०)

७९. पस्स सद्धाय सीलस्स, चागस्स च अयं फलं;

नागो नावाय वण्णेन, सद्धं वहतुपासकं.

८०. सब्भिरेव समासेथ, सब्भि कुब्बेथ सन्थवं;

सतञ्हि सन्निवासेन, सोत्थिं गच्छति न्हापितोति.

सीलानिसंसजातकं दसमं.

असदिसवग्गो चतुत्थो.

तस्सुद्दानं –

धनुग्गह कुञ्जर अप्परसो, गिरिदत्तमनाविलचित्तवरं;

दधिवाहन जम्बूक सीहनखो, हरितयव नागवरेन दसाति.