४६०. युधञ्चयजातकं (६)

७३. मित्तामच्चपरिब्यूळ्हं [परिब्बूळ्हं (सी. पी.)], अहं वन्दे रथेसभं;

पब्बजिस्सामहं राज [पब्बजिस्सं महाराज (सी. पी.)], तं देवो अनुमञ्ञतु.

७४. सचे ते ऊनं कामेहि, अहं परिपूरयामि [अहंव पूरयामि (क.)] ते;

यो तं हिंसति वारेमि, मा पब्बज [पब्बजि (पी.)] युधञ्चय [युधञ्जय (सी. स्या.), युवञ्जय (पी.)].

७५. न मत्थि ऊनं कामेहि, हिंसिता मे न विज्जति;

दीपञ्च कातुमिच्छामि, यं जरा नाभिकीरति.

७६. पुत्तो वा पितरं याचे, पिता वा पुत्तमोरसं;

नेगमो तं याचे [नेगमो याचते (सी. स्या. पी.)] तात, मा पब्बज युधञ्चय.

७७. मा मं देव निवारेहि, पब्बजन्तं रथेसभ;

माहं कामेहि सम्मत्तो, जराय वसमन्वगू.

७८. अहं तं तात याचामि, अहं पुत्त निवारये;

चिरं तं दट्ठुमिच्छामि, मा पब्बज युधञ्चय.

७९. उस्सावोव तिणग्गम्हि, सूरियुग्गमनं पति;

एवमायु मनुस्सानं, मा मं अम्म निवारय.

८०. तरमानो इमं यानं, आरोपेतु [तरमाना इमं यानं, आरोपेन्तु (सी. पी.)] रथेसभ;

मा मे माता तरन्तस्स, अन्तरायकरा अहु.

८१. अभिधावथ भद्दन्ते, सुञ्ञं हेस्सति रम्मकं;

युधञ्चयो अनुञ्ञातो, सब्बदत्तेन राजिना.

८२. योहु सेट्ठो सहस्सस्स [मनुस्सानं (स्या.), सहस्सानं (क.)], युवा कञ्चनसन्निभो;

सोयं कुमारो पब्बजितो, कासायवसनो बली.

८३. उभो कुमारा पब्बजिता, युधञ्चयो युधिट्ठिलो;

पहाय मातापितरो, सङ्गं छेत्वान मच्चुनोति.

युधञ्चयजातकं छट्ठं.