१. वितक्कसुत्तं

८०. वुत्तञ्हेतं भगवता, वुत्तमरहताति मे सुतं –

‘‘तयोमे, भिक्खवे, अकुसलवितक्का. कतमे तयो? अनवञ्ञत्तिपटिसंयुत्तो वितक्को, लाभसक्कारसिलोकपटिसंयुत्तो वितक्को, परानुद्दयतापटिसंयुत्तो वितक्को. इमे खो, भिक्खवे, तयो अकुसलवितक्का’’ति. एतमत्थं भगवा अवोच. तत्थेतं इति वुच्चति –

‘‘अनवञ्ञत्तिसंयुत्तो, लाभसक्कारगारवो;

सहनन्दी अमच्चेहि, आरा संयोजनक्खया.

‘‘यो च पुत्तपसुं हित्वा, विवाहे संहरानि [सङ्गहानि (क. सी. स्या. पी.)] च;

भब्बो सो तादिसो भिक्खु, फुट्ठुं सम्बोधिमुत्तम’’न्ति.

अयम्पि अत्थो वुत्तो भगवता, इति मे सुतन्ति. पठमं.