९. धातुसोसंसन्दनसुत्तं

७८. वुत्तञ्हेतं भगवता, वुत्तमरहताति मे सुतं –

‘‘धातुसो, भिक्खवे, सत्ता सत्तेहि सद्धिं संसन्दन्ति समेन्ति. हीनाधिमुत्तिका सत्ता हीनाधिमुत्तिकेहि सत्तेहि सद्धिं संसन्दन्ति समेन्ति, कल्याणाधिमुत्तिका सत्ता कल्याणाधिमुत्तिकेहि सत्तेहि सद्धिं संसन्दन्ति समेन्ति.

‘‘अतीतम्पि, भिक्खवे, अद्धानं धातुसोव सत्ता सत्तेहि सद्धिं संसन्दिंसु समिंसु. हीनाधिमुत्तिका सत्ता हीनाधिमुत्तिकेहि सत्तेहि सद्धिं संसन्दिंसु समिंसु, कल्याणाधिमुत्तिका सत्ता कल्याणाधिमुत्तिकेहि सत्तेहि सद्धिं संसन्दिंसु समिंसु.

‘‘अनागतम्पि, भिक्खवे, अद्धानं धातुसोव सत्ता सत्तेहि सद्धिं संसन्दिस्सन्ति समेस्सन्ति. हीनाधिमुत्तिका सत्ता हीनाधिमुत्तिकेहि सत्तेहि सद्धिं संसन्दिस्सन्ति समेस्सन्ति, कल्याणाधिमुत्तिका सत्ता कल्याणाधिमुत्तिकेहि सत्तेहि सद्धिं संसन्दिस्सन्ति समेस्सन्ति.

‘‘एतरहिपि, भिक्खवे, पच्चुप्पनं अद्धानं धातुसोव सत्ता सत्तेहि सद्धिं संसन्दन्ति समेन्ति. हीनाधिमुत्तिका सत्ता हीनाधिमुत्तिकेहि सत्तेहि सद्धिं संसन्दन्ति समेन्ति, कल्याणाधिमुत्तिका सत्ता कल्याणाधिमुत्तिकेहि सत्तेहि सद्धिं संसन्दन्ति समेन्ती’’ति. एतमत्थं भगवा अवोच. तत्थेतं इति वुच्चति –

‘‘संसग्गा वनथो जातो, असंसग्गेन छिज्जति;

परित्तं दारुमारुय्ह, यथा सीदे महण्णवे.

‘‘एवं कुसीतमागम्म, साधुजीवीपि सीदति;

तस्मा तं परिवज्जेय्य, कुसीतं हीनवीरियं.

‘‘पविवित्तेहि अरियेहि, पहितत्तेहि झायिभि;

निच्चं आरद्धवीरियेहि, पण्डितेहि सहावसे’’ति.

अयम्पि अत्थो वुत्तो भगवता, इति मे सुतन्ति. नवमं.