१५. महालोमहंसचरिया

११९. ‘‘सुसाने सेय्यं कप्पेमि, छवट्ठिकं उपनिधायहं;

गामण्डला [गोमण्डला (सी.), गाममण्डला (स्या.)] उपागन्त्वा, रूपं दस्सेन्तिनप्पकं.

१२०. ‘‘अपरे गन्धमालञ्च, भोजनं विविधं बहुं;

उपायनानूपनेन्ति, हट्ठा संविग्गमानसा.

१२१. ‘‘ये मे दुक्खं उपहरन्ति, ये च देन्ति सुखं मम;

सब्बेसं समको होमि, दया कोपो न विज्जति.

१२२. ‘‘सुखदुक्खे तुलाभूतो, यसेसु अयसेसु च;

सब्बत्थ समको होमि, एसा मे उपेक्खापारमी’’ति.

महालोमहंसचरियं पन्नरसमं.

युधञ्जयवग्गो ततियो.