८. धम्मदेवपुत्तचरिया

६६. ‘‘पुनापरं यदा होमि, महापक्खो महिद्धिको;

धम्मो नाम महायक्खो, सब्बलोकानुकम्पको.

६७. ‘‘दसकुसलकम्मपथे, समादपेन्तो महाजनं;

चरामि गामनिगमं, समित्तो सपरिज्जनो.

६८. ‘‘पापो कदरियो यक्खो, दीपेन्तो दस पापके;

सोपेत्थ महिया चरति, समित्तो सपरिज्जनो.

६९. ‘‘धम्मवादी अधम्मो च, उभो पच्चनिका मयं;

धुरे धुरं घट्टयन्ता, समिम्हा पटिपथे उभो.

७०. ‘‘कलहो वत्तती भेस्मा, कल्याणपापकस्स च;

मग्गा ओक्कमनत्थाय, महायुद्धो उपट्ठितो.

७१. ‘‘यदिहं तस्स कुप्पेय्यं, यदि भिन्दे तपोगुणं;

सहपरिजनं तस्स, रजभूतं करेय्यहं.

७२. ‘‘अपिचाहं सीलरक्खाय, निब्बापेत्वान मानसं;

सह जनेनोक्कमित्वा, पथं पापस्स दासहं.

७३. ‘‘सह पथतो ओक्कन्ते, कत्वा चित्तस्स निब्बुतिं;

विवरं अदासि पथवी, पापयक्खस्स तावदे’’ति.

धम्मदेवपुत्तचरियं अट्ठमं.