३. चम्पेय्यनागचरिया

२०. ‘‘पुनापरं यदा होमि, चम्पेय्यको महिद्धिको;

तदापि धम्मिको आसिं, सीलब्बतसमप्पितो.

२१. ‘‘तदापि मं धम्मचारिं, उपवुत्थं उपोसथं;

अहितुण्डिको गहेत्वान, राजद्वारम्हि कीळति.

२२. ‘‘यं यं सो वण्णं चिन्तयि, नीलंव पीतलोहितं;

तस्स चित्तानुवत्तन्तो, होमि चिन्तितसन्निभो.

२३. ‘‘थलं करेय्यमुदकं, उदकम्पि थलं करे;

यदिहं तस्स पकुप्पेय्यं, खणेन छारिकं करे.

२४. ‘‘यदि चित्तवसी हेस्सं, परिहायिस्सामि सीलतो;

सीलेन परिहीनस्स, उत्तमत्थो न सिज्झति.

२५. ‘‘कामं भिज्जतुयं कायो, इधेव विकिरीयतु;

नेव सीलं पभिन्देय्यं, विकिरन्ते भुसं विया’’ति.

चम्पेय्यनागचरियं ततियं.