८. कण्डुपटिच्छादिसिक्खापदवण्णना

५३७. अट्ठमे – कण्डुपटिच्छादि अनुञ्ञाता होतीति कत्थ अनुञ्ञाता? चीवरक्खन्धके बेलट्ठसीसवत्थुस्मिं. वुत्तञ्हि तत्थ – ‘‘अनुजानामि, भिक्खवे, यस्स कण्डु वा पिळका वा अस्सावो वा थुल्लकच्छु वा आबाधो तस्स कण्डुपटिच्छादि’’न्ति (महाव. ३५४).

५३९. यस्स अधोनाभि उब्भजाणुमण्डलन्ति यस्स भिक्खुनो नाभिया हेट्ठा जाणुमण्डलानं उपरि. कण्डूति कच्छु. पिळकाति लोहिततुण्डिका सुखुमपिळका. अस्सावोति अरिसभगन्दरमधुमेहादीनं वसेन असुचिपग्घरणकं. थुल्लकच्छु वा आबाधोति महापिळकाबाधो वुच्चति. सेसमेत्थ उत्तानमेव. छसमुट्ठानं.

कण्डुपटिच्छादिसिक्खापदं अट्ठमं.