९. विकप्पनसिक्खापदवण्णना

३७४. नवमे – तस्स वा अदिन्नन्ति चीवरसामिकस्स ‘‘परिभुञ्ज वा विस्सज्जेहि वा यथापच्चयं वा करोही’’ति एवं वत्वा अदिन्नं. तस्स वा अविस्ससन्तोति येन विनयकम्मं कतं, तस्स अविस्सासेन वा. तेन पन दिन्नं वा तस्स विस्सासेन वा परिभुञ्जन्तस्स अनापत्ति. सेसमेत्थ तिंसकवण्णनायं वुत्तनयत्ता उत्तानमेवाति. कथिनसमुट्ठानं – कायवाचतो कायवाचाचित्ततो च समुट्ठाति, किरियाकिरियं, नोसञ्ञाविमोक्खं, अचित्तकं, पण्णत्तिवज्जं, कायकम्मं, वचीकम्मं, तिचित्तं, तिवेदनन्ति.

विकप्पनसिक्खापदं नवमं.