७. नहानसिक्खापदवण्णना

३६४. सत्तमे – चुण्णेन वा मत्तिकाय वाति एत्थ चुण्णमत्तिकानं अभिसङ्खरणकालतो पट्ठाय सब्बपयोगेसु दुक्कटं.

३६६. पारं गच्छन्तो न्हायतीति एत्थ सुक्खाय नदिया वालिकं उक्किरित्वा कतआवाटकेसुपि न्हायितुं वट्टति. आपदासूति भमरादीहि अनुबद्धस्स उदके निमुज्जितुं वट्टतीति. सेसमेत्थ उत्तानमेव. एळकलोमसमुट्ठानं – किरियं, नोसञ्ञाविमोक्खं, अचित्तकं, पण्णत्तिवज्जं, कायकम्मं, तिचित्तं, तिवेदनन्ति.

नहानसिक्खापदं सत्तमं.