१०. उय्योधिकसिक्खापदवण्णना

३२२. दसमे – उग्गन्त्वा उग्गन्त्वा एत्थ युज्झन्तीति उय्योधिकं; सम्पहारट्ठानस्सेतं अधिवचनं. बलस्स अग्गं जानन्ति एत्थाति बलग्गं; बलगणनट्ठानन्ति अत्थो. सेनाय वियूहं सेनाब्यूहं; सेनानिवेसस्सेतं अधिवचनं. तयो हत्थी पच्छिमं हत्थानीकन्ति यो पुब्बे वुत्तो द्वादसपुरिसो हत्थीति तेन हत्थिना तयो हत्थी. सेसेसुपि एसेव नयो. सेसं उय्युत्तसेनासिक्खापदे वुत्तनयेनेव वेदितब्बं सद्धिं समुट्ठानादीहीति.

उय्योधिकसिक्खापदं दसमं.

समत्तो वण्णनाक्कमेन अचेलकवग्गो पञ्चमो.