८. उपवाणसन्दिट्ठिकसुत्तवण्णना

७०. अट्ठमे रूपप्पटिसंवेदीति नीलपीतादिभेदं आरम्मणं ववत्थापेन्तो रूपं पटिसंविदितं करोति, तस्मा रूपप्पटिसंवेदी नाम होति. रूपरागप्पटिसंवेदीति किलेसस्स अत्थिभावेनेव पन रूपरागं पटिसंविदितं करोति नाम, तस्मा रूपरागप्पटिसंवेदीति वुच्चति. सन्दिट्ठिकोतिआदीनि विसुद्धिमग्गे वुत्तत्थानेव. नो च रूपरागप्पटिसंवेदीति किलेसस्स नत्थिभावेनेव न रूपरागं पटिसंविदितं करोति नाम, तस्मा ‘‘नो च रूपरागप्पटिसंवेदी’’ति वुच्चति. इमस्मिं सुत्ते सेखासेखानं पच्चवेक्खणा कथिता.