७-१०. अनुधम्मसुत्तादिवण्णना

३९-४२. सत्तमे धम्मानुधम्मप्पटिपन्नस्साति नवन्नं लोकुत्तरधम्मानं अनुलोमधम्मं पुब्बभागपटिपदं पटिपन्नस्स. अयमनुधम्मोति अयं अनुलोमधम्मो होति. निब्बिदाबहुलोति उक्कण्ठनबहुलो हुत्वा. परिजानातीति तीहि परिञ्ञाहि परिजानाति. परिमुच्चतीति मग्गक्खणे उप्पन्नाय पहानपरिञ्ञाय परिमुच्चति. एवं इमस्मिं सुत्ते मग्गोव कथितो होति, तथा इतो परेसु तीसु. इध पन अनुपस्सना अनियमिता, तेसु नियमिता. तस्मा इधापि सा तत्थ नियमितवसेनेव नियमेतब्बा. न हि सक्का तीसु अञ्ञतरं अनुपस्सनं विना निब्बिन्दितुं परिजानितुं वाति. सत्तमादीनि.

नतुम्हाकवग्गो चतुत्थो.