१. नदीसुत्तवण्णना

९३. पुप्फवग्गस्स पठमे पब्बतेय्याति पब्बते पवत्ता. ओहारिनीति सोते पतितपतितानि तिणपण्णकट्ठादीनि हेट्ठाहारिनी. दूरङ्गमाति निक्खन्तट्ठानतो पट्ठाय चतुपञ्चयोजनसतगामिनी. सीघसोताति चण्डसोता. कासातिआदीनि सब्बानि तिणजातानि. रुक्खाति एरण्डादयो दुब्बलरुक्खा. ते नं अज्झोलम्बेय्युन्ति ते तीरे जातापि ओनमित्वा अग्गेहि उदकं फुसन्तेहि अधिओलम्बेय्युं, उपरि लम्बेय्युन्ति अत्थो. पलुज्जेय्युन्ति समूलमत्तिकाय सद्धिं सीसे पतेय्युं. सो तेहि अज्झोत्थटो वालुकमत्तिकोदकेहि मुखं पविसन्तेहि महाविनासं पापुणेय्य.

एवमेव खोति एत्थ सोते पतितपुरिसो विय वट्टसन्निस्सितो बालपुथुज्जनो दट्ठब्बो, उभतोतीरे कासादयो विय दुब्बलपञ्चक्खन्धा, ‘‘इमे गहितापि मं तारेतुं न सक्खिस्सन्ती’’ति तस्स पुरिसस्स अजानित्वा गहणं विय इमे खन्धा ‘‘न मय्हं सहाया’’ति बालपुथुज्जनस्स अजानित्वा चतूहि गाहेहि गहणं, गहितगहितानं पलुज्जनत्ता पुरिसस्स ब्यसनप्पत्ति विय चतूहि गाहेहि गहितानं खन्धानं विपरिणामे बालपुथुज्जनस्स सोकादिब्यसनप्पत्ति वेदितब्बा. पठमं.