९. उपयन्तिसुत्तवण्णना

६९. नवमे उपयन्तोति उदकवड्ढनसमये उपरि गच्छन्तो. महानदियोति गङ्गायमुनादिका महासरितायो. उपयापेतीति उपरि यापेति, वड्ढेति पूरेतीति अत्थो. अविज्जा उपयन्तीति अविज्जा उपरि गच्छन्ती सङ्खारानं पच्चयो भवितुं सक्कुणन्ती. सङ्खारे उपयापेतीति सङ्खारे उपरि यापेति वड्ढेति. एवं सब्बपदेसु अत्थो वेदितब्बो. अपयन्तोति अपगच्छन्तो ओसरन्तो. अविज्जा अपयन्तीति अविज्जा अपगच्छमाना ओसरमाना उपरि सङ्खारानं पच्चयो भवितुं न सक्कुणन्तीति अत्थो. सङ्खारे अपयापेतीति सङ्खारे अपगच्छापेति. एस नयो सब्बपदेसु. नवमं.