७. नतुम्हसुत्तवण्णना

३७. सत्तमे न तुम्हाकन्ति अत्तनि हि सति अत्तनियं नाम होति. अत्तायेव च नत्थि, तस्मा ‘‘न तुम्हाक’’न्ति आह. नपि अञ्ञेसन्ति अञ्ञो नाम परेसं अत्ता, तस्मिं सति अञ्ञेसं नाम सिया, सोपि नत्थि, तस्मा ‘‘नपि अञ्ञेस’’न्ति आह. पुराणमिदं, भिक्खवे, कम्मन्ति नयिदं पुराणकम्ममेव, पुराणकम्मनिब्बत्तो पनेस कायो, तस्मा पच्चयवोहारेन एवं वुत्तो. अभिसङ्खतन्तिआदि कम्मवोहारस्सेव वसेन पुरिमलिङ्गसभागताय वुत्तं, अयं पनेत्थ अत्थो – अभिसङ्खतन्ति पच्चयेहि कतोति दट्ठब्बो. अभिसञ्चेतयितन्ति चेतनावत्थुको चेतनामूलकोति दट्ठब्बो. वेदनियन्ति वेदनियवत्थूति दट्ठब्बो. सत्तमं.