२. नन्दनविमानवण्णना

यथा वनं नन्दनं पभासतीति नन्दनविमानं. तस्स का उप्पत्ति? भगवा सावत्थियं विहरति जेतवने. तेन समयेन सावत्थियं अञ्ञतरो उपासकोतिआदि सब्बं अनन्तरविमानसदिसं. अयं पन दारपरिग्गहं कत्वा मातापितरो पोसेसीति अयमेव विसेसो.

११२०. यथा वनं नन्दनं पभासति, उय्यानसेट्ठं तिदसानमुत्तमं;

तथूपमं तुय्हमिदं विमानं, ओभासयं तिट्ठति अन्तलिक्खे.

११२१. ‘‘देविद्धिपत्तोसि महानुभावो…पे…वण्णो च ते सब्बदिसा पभासतीति.

११२२. ‘‘सो देवपुत्तो अत्तमनो…पे… यस्स कम्मस्सिदं फलं’’.

११२३. ‘‘अहं मनुस्सेसु मनुस्सभूतो, दलिद्दो अताणो कपणो कम्मकरो अहोसिं;

जिण्णे च मातापितरो अभारिं, पिया च मे सीलवन्तो अहेसुं;

अन्नञ्च पानञ्च पसन्नचित्तो, सक्कच्च दानं विपुलं अदासिं.

११२४. ‘‘तेन मेतादिसो वण्णो…पे…वण्णो च मे सब्बदिसा पभासती’’ति. –

गाथाहि ब्याकासि. तत्थ गाथासुपि अपुब्बं नत्थि.

नन्दनविमानवण्णना निट्ठिता.