४१-४२. खन्तिञाणपरियोगाहणञाणनिद्देसवण्णना

९२-९३. खन्तिञाणपरियोगाहणञाणनिद्देसेसु रूपं अनिच्चतो विदितन्ति अनिच्चानुपस्सनाय अनिच्चन्ति ञातं. रूपं दुक्खतो विदितन्ति दुक्खानुपस्सनाय दुक्खन्ति ञातं. रूपं अनत्ततो विदितन्ति अनत्तानुपस्सनाय अनत्ताति ञातं. यं यं विदितं, तं तं खमतीति यं यं रूपं अनिच्चादितो विदितं, तं तं रूपं अनिच्चादितो खमति रुच्चति. ‘‘रूपं अनिच्चतो विदितं, यं यं विदितं, तं तं खमती’’ति विसुं विसुञ्च कत्वा केसुचि पोत्थकेसु लिखितं. ‘‘वेदना सञ्ञा सङ्खारा अनिच्चतो विदिता’’तिआदिना लिङ्गवचनानि परिवत्तेत्वा योजेतब्बानि. फुसतीति विपस्सनाञाणफुसनेन फुसति फरति. परियोगहतीति विपस्सनाञाणेन पविसति. परियोगाहतीतिपि पाठो.

खन्तिञाणपरियोगाहणञाणनिद्देसवण्णना निट्ठिता.