१३. विमुत्तिञाणनिद्देसवण्णना

६४. विमुत्तिञाणनिद्देसे सक्कायदिट्ठीति विज्जमानट्ठेन सति खन्धपञ्चकसङ्खाते काये, सयं वा सती तस्मिं काये दिट्ठीति सक्कायदिट्ठि. विचिकिच्छाति विगता चिकिच्छा, सभावं वा विचिनन्तो एताय किच्छति किलमतीति विचिकिच्छा. सीलब्बतपरामासोति सीलेन सुद्धि वतेन सुद्धि सीलब्बतेन सुद्धीति गहितअभिनिवेसो. सो हि सभावं अतिक्कमित्वा परतो आमसतीति सीलब्बतपरामासो. उभिन्नं समानेपि दिट्ठिभावे तक्कञ्च परूपदेसञ्च विना पकतिया एव सक्कायदिट्ठिगहणतो पकतिभूताय वीसतिवत्थुकाय सक्कायदिट्ठिया पहानेनेव सब्बदिट्ठिप्पहानदस्सनत्थं सक्कायदिट्ठि वुत्ता. सीलब्बतपरामासो पन ‘‘सुद्धिपटिपदं पटिपज्जामा’’ति पटिपन्नानं पटिपदाय मिच्छाभावदस्सनत्थं विसुं वुत्तोति वेदितब्बो. तिण्णम्पि अनुसयप्पहानेनेव पहानं दस्सेतुं दिट्ठानुसयो विचिकिच्छानुसयोति वुत्तं, न विसुं किलेसत्ता. उपक्किलेसाति किलेसेन्ति उपतापेन्ति विबाधेन्तीति किलेसा, थामगतट्ठेन भुसा किलेसाति उपक्किलेसा. सम्मा समुच्छिन्ना होन्तीति समुच्छेदप्पहानेन अनुप्पादनिरोधेन सम्मा समुच्छिन्ना होन्ति. सपरियुट्ठानेहीति चित्तं परियोनन्धन्तानि उट्ठेन्ति उप्पज्जन्तीति परियुट्ठानानि, समुदाचारप्पत्तानं किलेसानमेतं अधिवचनं. सह परियुट्ठानेहीति सपरियुट्ठानानि. तेहि सपरियुट्ठानेहि अनुसयितउपक्किलेसेहि. चित्तं विमुत्तं होतीति तेसं अभब्बुप्पत्तिकभूतत्ता सन्ततिवसेन पवत्तमानं चित्तं ततो विमुत्तं नाम होति. तदेव सुट्ठु विमुत्तत्ता सुविमुत्तं. तंविमुत्तिञातट्ठेनाति तस्सा विमुत्तिया जाननट्ठेन.

विमुत्तिञाणनिद्देसवण्णना निट्ठिता.