७. सोचेय्यसुत्तवण्णना

६६. सत्तमे सोचेय्यानीति सुचिभावा. कायसोचेय्यन्ति कायसुचरितं, वचीमनोसोचेय्यानिपि वचीमनोसुचरितानेव. तथा हि वुत्तं ‘‘तत्थ कतमं कायसोचेय्यं? पाणातिपाता वेरमणी’’तिआदि (अ. नि. ३.१२१-१२२).

गाथायं समुच्छेदवसेन पहीनसब्बकायदुच्चरितत्ता कायेन सुचीति कायसुचि. सोचेय्यसम्पन्नन्ति पटिप्पस्सद्धकिलेसत्ता सुपरिसुद्धाय सोचेय्यसम्पत्तिया उपेतं. सेसं वुत्तनयमेव.

सत्तमसुत्तवण्णना निट्ठिता.