असेक्खधम्मदसकवण्णना

असेक्खा सम्मादिट्ठीतिआदयो सब्बेपि फलसम्पयुत्तधम्मा एव. एत्थ च सम्मादिट्ठि, सम्माञाणन्ति द्वीसु ठानेसु पञ्ञाव कथिता. सम्माविमुत्तीति इमिना पदेन वुत्तावसेसा. फलसमापत्तिधम्मा सङ्गहिताति वेदितब्बा.

‘‘इमे खो, आवुसो’’तिआदि वुत्तनयेनेव योजेतब्बं. इति छन्नं दसकानं वसेन समसट्ठि पञ्हे कथेन्तो थेरो सामग्गिरसं दस्सेसीति.

दसकवण्णना निट्ठिता.