१-६. सिक्खापदसुत्तवण्णना

२०१. पञ्चमस्स पठमे असप्पुरिसन्ति लामकपुरिसं तुच्छपुरिसं मूळ्हपुरिसं अविज्जाय अन्धीकतं बालं. असप्पुरिसतरन्ति अतिरेकेन असप्पुरिसं. इतरे द्वे वुत्तपटिपक्खवसेन वेदितब्बा. सेसमेत्थ उत्तानत्थमेव. यथा चेत्थ, एवं इतो परेसु पञ्चसु. एतेसु हि पठमं पञ्चवेरवसेन देसितं, दुतियं अस्सद्धम्मवसेन, ततियं कायवचीद्वारवसेन, चतुत्थं मनोद्वारवसेन, पञ्चमं अट्ठमिच्छत्तवसेन, छट्ठं दसमिच्छत्तवसेन.