७. रोगसुत्तवण्णना

१५७. सत्तमे विघातवाति महिच्छापच्चयेन विघातेन दुक्खेन समन्नागतो. असन्तुट्ठोति चतूसु पच्चयेसु तीहि सन्तोसेहि असन्तुट्ठो. अनवञ्ञप्पटिलाभायाति परेहि अनवजाननस्स पटिलाभत्थाय. लाभसक्कारसिलोकप्पटिलाभायाति सुसङ्खतचतुपच्चयसङ्खातस्स लाभसक्कारस्स चेव वण्णभणनसङ्खातस्स सिलोकस्स च पटिलाभत्थाय. सङ्खाय कुलानि उपसङ्कमतीति ‘‘इति मं एते जानिस्सन्ती’’ति जाननत्थाय कुलानि उपसङ्कमति. सेसपदेसुपि एसेव नयो.