८. दुतियतथागतअच्छरियसुत्तवण्णना

१२८. अट्ठमे तण्हादिट्ठीहि अल्लीयितब्बट्ठेन आलयोति पञ्च कामगुणा, सकलमेव वा वट्टं. आरमन्ति एत्थाति आरामो, आलयो आरामो एतिस्साति आलयारामा. आलये रताति आलयरता. आलये सम्मुदिताति आलयसम्मुदिता. अनालये धम्मेति आलयपटिपक्खे विवट्टूपनिस्सिते अरियधम्मे. सुस्सूसतीति सोतुकामो होति. सोतं ओदहतीति सोतं ठपेति. अञ्ञा चित्तं उपट्ठपेतीति आजाननत्थाय चित्तं पच्चुपट्ठपेति. मानोति मञ्ञना, मञ्ञितब्बट्ठेन वा सकलं वट्टमेव. मानविनये धम्मेति मानविनयधम्मे. उपसमपटिपक्खो अनुपसमो, अनुपसन्तट्ठेन वा वट्टमेव अनुपसमो नाम. ओपसमिकेति उपसमकरे विवट्टूपनिस्सिते. अविज्जाय गता समन्नागताति अविज्जागता. अविज्जण्डकोसेन परियोनद्धत्ता अण्डं विय भूताति अण्डभूता. समन्ततो ओनद्धाति परियोनद्धा. अविज्जाविनयेति अविज्जाविनयो वुच्चति अरहत्तं, तंनिस्सिते धम्मे देसियमानेति अत्थो. इति इमस्मिं सुत्ते चतूसु ठानेसु वट्टं, चतूसु विवट्टं कथितं.