६. संसप्पनीयसुत्तवण्णना

२१६. छट्ठे संसप्पनीयपरियायं वो, भिक्खवे, धम्मपरियायन्ति संसप्पनस्स कारणं देसनासङ्खातं धम्मदेसनं. संसप्पतीति तं कम्मं करोन्तो आसप्पति परिसप्पति विप्फन्दति. जिम्हा गतीति तेन कम्मेन यं गतिं गमिस्सति, सा जिम्हा होति. जिम्हुपपत्तीति तस्स यं गतिं उपपज्जिस्सति, सापि जिम्हाव होति. संसप्पजातिकाति संसप्पनसभावा. भूता भूतस्स उपपत्ति होतीति भूतस्मा सभावतो विज्जमानकम्मा सत्तस्स निब्बत्ति होति. फस्सा फुसन्तीति विपाकफस्सा फुसन्ति.