३. असञ्ञसत्ता

१०१७. असञ्ञसत्तानं देवानं उपपत्तिक्खणे कति खन्धा पातुभवन्ति…पे… कति चित्तानि पातुभवन्ति?

असञ्ञसत्तानं देवानं उपपत्तिक्खणे एको खन्धो पातुभवति – रूपक्खन्धो; द्वे आयतनानि पातुभवन्ति – रूपायतनं, धम्मायतनं; द्वे धातुयो पातुभवन्ति – रूपधातु, धम्मधातु; एकं सच्चं पातुभवति – दुक्खसच्चं; एकिन्द्रियं पातुभवति – रूपजीवितिन्द्रियं. असञ्ञसत्ता देवा अहेतुका अनाहारा अफस्सका अवेदनका असञ्ञका अचेतनका अचित्तका पातुभवन्ति.