(८) अट्ठ नेवसञ्ञीनासञ्ञीवादा

९५९. तत्थ कतमे अट्ठ नेवसञ्ञीनासञ्ञीवादा? ‘‘रूपी अत्ता होति अरोगो परं मरणा’’ति – नेवसञ्ञीनासञ्ञीति नं पञ्ञपेन्ति; ‘‘अरूपी अत्ता होति अरोगो परं मरणा’’ति – नेवसञ्ञीनासञ्ञीति नं पञ्ञपेन्ति; ‘‘रूपी च अरूपी च अत्ता होति अरोगो परं मरणा’’ति – नेवसञ्ञीनासञ्ञीति नं पञ्ञपेन्ति; ‘‘नेवरूपीनारूपी अत्ता होति अरोगो परं मरणा’’ति – नेवसञ्ञीनासञ्ञीति नं पञ्ञपेन्ति; ‘‘अन्तवा अत्ता होति अरोगो परं मरणा’’ति – नेवसञ्ञीनासञ्ञीति नं पञ्ञपेन्ति; ‘‘अनन्तवा अत्ता होति अरोगो परं मरणा’’ति – नेवसञ्ञीनासञ्ञीति नं पञ्ञपेन्ति; ‘‘अन्तवा च अनन्तवा च अत्ता होति अरोगो परं मरणा’’ति – नेवसञ्ञीनासञ्ञीति नं पञ्ञपेन्ति; ‘‘नेवन्तवा नानन्तवा अत्ता होति अरोगो परं मरणा’’ति – नेवसञ्ञीनासञ्ञीति नं पञ्ञपेन्ति. इमे अट्ठ नेवसञ्ञीनासञ्ञीवादा.

अट्ठकं.