९. नवकनिद्देसो

(१) नव आघातवत्थूनि

९६०. तत्थ कतमानि नव आघातवत्थूनि? ‘‘अनत्थं मे अचरी’’ति आघातो जायति; ‘‘अनत्थं मे चरती’’ति आघातो जायति; ‘‘अनत्थं मे चरिस्सती’’ति आघातो जायति; ‘‘पियस्स मे मनापस्स अनत्थं अचरि’’…पे… अनत्थं चरति…पे… अनत्थं चरिस्सतीति आघातो जायति; अप्पियस्स मे अमनापस्स अत्थं अचरि…पे… अत्थं चरति…पे… अत्थं चरिस्सतीति आघातो जायति. इमानि नव आघातवत्थूनि.

(२) नव पुरिसमलानि

९६१. तत्थ कतमानि नव पुरिसमलानि? कोधो, मक्खो, इस्सा, मच्छरियं, माया, साठेय्यं, मुसावादो, पापिच्छता, मिच्छादिट्ठि – इमानि नव पुरिसमलानि.

(३) नवविधा माना

९६२. तत्थ कतमे नवविधा माना? ‘‘सेय्यस्स सेय्योहमस्मी’’ति मानो, ‘‘सेय्यस्स सदिसोहमस्मी’’ति मानो, ‘‘सेय्यस्स हीनोहमस्मी’’ति मानो, ‘‘सदिसस्स सेय्योहमस्मी’’ति मानो, ‘‘सदिसस्स सदिसोहमस्मी’’ति मानो, ‘‘सदिसस्स हीनोहमस्मी’’ति मानो, ‘‘हीनस्स सेय्योहमस्मी’’ति मानो, ‘‘हीनस्स सदिसोहमस्मी’’ति मानो, ‘‘हीनस्स हीनोहमस्मी’’ति मानो – इमे नवविधा माना.

(४) नव तण्हामूलका धम्मा

९६३. तत्थ कतमे नव तण्हामूलका धम्मा? तण्हं पटिच्च परियेसना, परियेसनं पटिच्च लाभो, लाभं पटिच्च विनिच्छयो, विनिच्छयं पटिच्च छन्दरागो, छन्दरागं पटिच्च अज्झोसानं, अज्झोसानं पटिच्च परिग्गहो, परिग्गहं पटिच्च मच्छरियं, मच्छरियं पटिच्च आरक्खो, आरक्खाधिकरणं दण्डादान-सत्थादान-कलह-विग्गहविवाद-तुवंतुवं-पेसुञ्ञ-मुसावादा अनेके पापका अकुसला धम्मा सम्भवन्ति – इमे नव तण्हामूलका धम्मा.

(५) नव इञ्जितानि

९६४. तत्थ कतमानि नव इञ्जितानि? ‘‘अस्मी’’ति इञ्जितमेतं, ‘‘अहमस्मी’’ति इञ्जितमेतं, ‘‘अयमहमस्मी’’ति इञ्जितमेतं ‘‘भविस्स’’न्ति इञ्जितमेतं, ‘‘रूपी भविस्स’’न्ति इञ्जितमेतं, ‘‘अरूपी भविस्स’’न्ति इञ्जितमेतं, ‘‘सञ्ञी भविस्स’’न्ति इञ्जितमेतं, ‘‘असञ्ञी भविस्स’’न्ति इञ्जितमेतं, ‘‘नेवसञ्ञीनासञ्ञी भविस्स’’न्ति इञ्जितमेतं – इमानि नव इञ्जितानि.

(६-९) नव मञ्ञितादीनि

९६५. तत्थ कतमानि नव मञ्ञितानि… नव फन्दितानि… नव पपञ्चितानि… नव सङ्खतानि? ‘‘अस्मी’’ति सङ्खतमेतं, ‘‘अहमस्मी’’ति सङ्खतमेतं, ‘‘अयमहमस्मी’’ति सङ्खतमेतं, ‘‘भविस्स’’न्ति सङ्खतमेतं, ‘‘रूपी भविस्स’’न्ति सङ्खतमेतं, ‘‘अरूपी भविस्स’’न्ति सङ्खतमेतं, ‘‘सञ्ञी भविस्स’’न्ति सङ्खतमेतं, ‘‘असञ्ञी भविस्स’’न्ति सङ्खतमेतं, ‘‘नेवसञ्ञीनासञ्ञी भविस्स’’न्ति सङ्खतमेतं – इमानि नव सङ्खतानि.

नवकं.