१०. दसकनिद्देसो

(१) दस किलेसवत्थूनि

९६६. तत्थ कतमानि दस किलेसवत्थूनि? लोभो, दोसो, मोहो, मानो, दिट्ठि, विचिकिच्छा, थिनं, उद्धच्चं, अहिरिकं, अनोत्तप्पं – इमानि दस किलेसवत्थूनि.

(२) दस आघातवत्थूनि

९६७. तत्थ कतमानि दस आघातवत्थूनि? ‘‘अनत्थं मे अचरी’’ति आघातो जायति, ‘‘अनत्थं मे चरती’’ति आघातो जायति, ‘‘अनत्थं मे चरिस्सती’’ति आघातो जायति, ‘‘पियस्स मे मनापस्स अनत्थं अचरि’’…पे… अनत्थं चरति…पे… अनत्थं चरिस्सतीति आघातो जायति, अप्पियस्स मे अमनापस्स अत्थं अचरि…पे… अत्थं चरति…पे… अत्थं चरिस्सतीति आघातो जायति, अट्ठाने वा पन आघातो जायति – इमानि दस आघातवत्थूनि.

(३) दस अकुसलकम्मपथा

९६८. तत्थ कतमे दस अकुसलकम्मपथा? पाणातिपातो, अदिन्नादानं, कामेसुमिच्छाचारो, मुसावादो, पिसुणा वाचा, फरुसा वाचा, सम्फप्पलापो, अभिज्झा, ब्यापादो, मिच्छादिट्ठि – इमे दस अकुसलकम्मपथा.

(४) दस संयोजनानि

९६९. तत्थ कतमानि दस संयोजनानि? कामरागसंयोजनं, पटिघसंयोजनं, मानसंयोजनं, दिट्ठिसंयोजनं, विचिकिच्छासंयोजनं, सीलब्बतपरामाससंयोजनं, भवरागसंयोजनं, इस्सासंयोजनं, मच्छरियसंयोजनं, अविज्जासंयोजनं – इमानि दस संयोजनानि.

(५) दस मिच्छत्ता

९७०. तत्थ कतमे दस मिच्छत्ता? मिच्छादिट्ठि, मिच्छासङ्कप्पो, मिच्छावाचा, मिच्छाकम्मन्तो, मिच्छाआजीवो, मिच्छावायामो, मिच्छासति, मिच्छासमाधि, मिच्छाञाणं, मिच्छाविमुत्ति – इमे दस मिच्छत्ता.

(६) दसवत्थुका मिच्छादिट्ठि

९७१. तत्थ कतमा दसवत्थुका मिच्छादिट्ठि? नत्थि दिन्नं, नत्थि यिट्ठं, नत्थि हुतं, नत्थि सुकतदुक्कटानं कम्मानं फलं विपाको, नत्थि अयं लोको, नत्थि परो लोको, नत्थि माता, नत्थि पिता, नत्थि सत्ता ओपपातिका, नत्थि लोके समणब्राह्मणा सम्मग्गता [समग्गता (क.)] सम्मा पटिपन्ना ये इमञ्च लोकं परञ्च लोकं सयं अभिञ्ञा सच्छिकत्वा पवेदेन्तीति – अयं दसवत्थुका मिच्छादिट्ठि.

(७) दसवत्थुका अन्तग्गाहिका दिट्ठि

९७२. तत्थ कतमा दसवत्थुका अन्तग्गाहिका दिट्ठि? सस्सतो लोकोति वा, असस्सतो लोकोति वा, अन्तवा लोकोति वा, अनन्तवा लोकोति वा, तं जीवं तं सरीरन्ति वा, अञ्ञं जीवं अञ्ञं सरीरन्ति वा, होति तथागतो परं मरणाति वा, न होति तथागतो परं मरणाति वा, होति च न च होति तथागतो परं मरणाति वा, नेव होति न न होति तथागतो परं मरणाति वा – अयं दसवत्थुका अन्तग्गाहिका दिट्ठि.

दसकं.