(५) तीणि दुच्चरितानि

९१३. तत्थ कतमानि तीणि दुच्चरितानि? कायदुच्चरितं, वचीदुच्चरितं, मनोदुच्चरितं.

(क) तत्थ कतमं कायदुच्चरितं? पाणातिपातो, अदिन्नादानं, कामेसुमिच्छाचारो – इदं वुच्चति ‘‘कायदुच्चरितं’’.

(ख) तत्थ कतमं वचीदुच्चरितं? मुसावादो, पिसुणा वाचा, फरुसा वाचा, सम्फप्पलापो – इदं वुच्चति ‘‘वचीदुच्चरितं’’.

(ग) तत्थ कतमं मनोदुच्चरितं? अभिज्झा, ब्यापादो, मिच्छादिट्ठि – इदं वुच्चति ‘‘मनोदुच्चरितं’’.

(क-ग) तत्थ कतमं कायदुच्चरितं? अकुसलं कायकम्मं कायदुच्चरितं, अकुसलं वचीकम्मं वचीदुच्चरितं, अकुसलं मनोकम्मं मनोदुच्चरितं.

तत्थ कतमं अकुसलं कायकम्मं? अकुसला कायसञ्चेतना अकुसलं कायकम्मं, अकुसला वचीसञ्चेतना अकुसलं वचीकम्मं, अकुसला मनोसञ्चेतना अकुसलं मनोकम्मं. इमानि तीणि दुच्चरितानि.