(६) तयो आसवा

९१४. तत्थ कतमे तयो आसवा? कामासवो, भवासवो, अविज्जासवो.

(क) तत्थ कतमो कामासवो? यो कामेसु कामच्छन्दो कामरागो कामनन्दी कामतण्हा कामसिनेहो कामपरिळाहो काममुच्छा कामज्झोसानं – अयं वुच्चति ‘‘कामासवो’’.

(ख) तत्थ कतमो भवासवो? यो भवेसु भवच्छन्दो…पे… भवज्झोसानं – अयं वुच्चति ‘‘भवासवो’’.

(ग) तत्थ कतमो अविज्जासवो? दुक्खे अञ्ञाणं…पे… अविज्जालङ्गी मोहो अकुसलमूलं – अयं वुच्चति ‘‘अविज्जासवो’’. इमे तयो आसवा.