(३५. क) अयोनिसो मनसिकारो

९३६. तत्थ कतमो अयोनिसो मनसिकारो? अनिच्चे ‘‘निच्च’’न्ति अयोनिसो मनसिकारो, दुक्खे ‘‘सुख’’न्ति अयोनिसो मनसिकारो, अनत्तनि ‘‘अत्ता’’ति अयोनिसो मनसिकारो, असुभे ‘‘सुभ’’न्ति अयोनिसो मनसिकारो, सच्चविप्पटिकुलेन वा चित्तस्स आवट्टना अनावट्टना आभोगो समन्नाहारो मनसिकारो – अयं वुच्चति ‘‘अयोनिसो मनसिकारो’’.

(ख) कुम्मग्गसेवना

तत्थ कतमा कुम्मग्गसेवना? तत्थ कतमो कुम्मग्गो? मिच्छादिट्ठि, मिच्छासङ्कप्पो, मिच्छावाचा, मिच्छाकम्मन्तो, मिच्छाआजीवो, मिच्छावायामो, मिच्छासति, मिच्छासमाधि – अयं वुच्चति ‘‘कुम्मग्गो’’. या इमस्स कुम्मग्गस्स सेवना निसेवना संसेवना भजना सम्भजना भत्ति सम्भत्ति तंसम्पवङ्कता – अयं वुच्चति ‘‘कुम्मग्गसेवना’’.

(ग) चेतसो च लीनत्तं

तत्थ कतमं चेतसो च लीनत्तं? या चित्तस्स अकल्यता अकम्मञ्ञता ओलीयना सल्लीयना लीनं लीयना लीयितत्तं थिनं थियना थियितत्तं चित्तस्स – इदं वुच्चति ‘‘चेतसो च लीनत्तं’’.

तिकं.