(३३. क) अरियानं अदस्सनकम्यता

९३४. तत्थ कतमा अरियानं अदस्सनकम्यता? तत्थ कतमे अरिया? अरिया वुच्चन्ति बुद्धा च बुद्धसावका च. या इमेसं अरियानं अदस्सनकम्यता अदट्ठुकम्यता असमेतुकम्यता असमागन्तुकम्यता – अयं वुच्चति ‘‘अरियानं अदस्सनकम्यता’’.

(ख) सद्धम्मं असोतुकम्यता

तत्थ कतमा सद्धम्मं असोतुकम्यता? तत्थ कतमो सद्धम्मो? चत्तारो सतिपट्ठाना, चत्तारो सम्मप्पधाना, चत्तारो इद्धिपादा, पञ्चिन्द्रियानि, पञ्च बलानि, सत्त बोज्झङ्गा, अरियो अट्ठङ्गिको मग्गो – अयं वुच्चति ‘‘सद्धम्मो’’. या इमस्स सद्धम्मस्स असोतुकम्यता असवनकम्यता अनुग्गहेतुकम्यता अधारेतुकम्यता – अयं वुच्चति ‘‘सद्धम्मं असोतुकम्यता’’.

(ग) उपारम्भचित्तता

तत्थ कतमा उपारम्भचित्तता? तत्थ कतमो उपारम्भो? यो उपारम्भो अनुपारम्भो उपारम्भना अनुपारम्भना अनुपारम्भितत्तं उञ्ञा अवञ्ञा परिभवो रन्धगवेसिता – अयं वुच्चति ‘‘उपारम्भचित्तता’’.