२. पुरवग्ग

१९८. पुरं नगर मित्थी वा, ठानीयं पुटभेदनं;

थियं तु राजधानी [राजठानी (टी.)] च, खन्धावारो भवे थ च.

१९९. साखानगर मञ्ञत्र, यं तं मूलपुरा पुरं;

बाराणसी च सावत्थि, वेसाली मिथिला, ळवी.

२००. कोसम्बु, ज्जेनियो तक्क, सिला चम्पा च सागलं;

सुसुमारगिरं [संसुमार (टीका)] राज, गहं कपिलवत्थु च.

२०१. साकेत, मिन्दपत्थञ्चो, क्कट्ठा पाटलिपुत्तकं;

जेतुत्तरञ्च सङ्कस्सं, कुसिनारादयो पुरी.

२०२. रच्छा च विसिखा वुत्ता, रथिका वीथि चाप्यथ;

ब्यूहो रच्छा अनिब्बिद्धा, निब्बिद्धा तु पथद्धि च.

२०३. चतुक्कं चच्चरे मग्ग, सन्धि सिङ्घाटकं भवे;

पाकारो वरणो चाथ, उदापो [उद्दाप, उद्दाप] उपकारिका.

२०४. कुट्टं तु भित्ति नारी थ, गोपुरं द्वारकोट्ठको;

एसिका इन्दखीलो च, अट्टो त्वट्टालको भवे.

२०५. तोरणं तु बहिद्वारं, परिखातु च दीघिका;

मन्दिरं सदना, गारं, निकायो निलया, लयो.

२०६. आवासो भवनं वेस्मं, निकेतनं निवेसनं;

घरं गहञ्चा, वसथो, सरणञ्च पतिस्सयो.

२०७. ओकं साला खयो वासो, थियं कुटि वसत्य’पि;

गेहञ्चा, नित्थि सदुमं, चेतिया, यतनानि तु.

२०८. पासादो चेव यूपो थ, मुण्डच्छदो च हम्मियं;

यूपोतु गजकुम्भम्हि, हत्थिनखो पतिट्ठितो.

२०९. सुपण्णवङ्कच्छदन, मड्ढयोगो सिया थ च;

एककूटयुतो माळो,

पासादो चतुरस्सको.

२१०. सभायञ्च सभा चाथ, मण्डपं वा जनालयो;

अथो आसनसालायं, पटिक्कमन मीरितं.

२११. जिनस्स वासभवन, मित्थी गन्धकुटि प्यथ;

थियं रसवती पाक, ट्ठानञ्चेव महानसं.

२१२. आवेसनं सिप्पसाला, सोण्डा तु पानमन्दिरं;

वच्चट्ठानं वच्चकुटि, मुनीनं ठान मस्समो.

२१३. पण्यविक्कयसाला कु, आपणो पण्यवीथिका;

उदोसितो भण्डसाला, चङ्कमनं तु चङ्कमो.

२१४. जन्ताघरं त्वग्गिसाला, पपा पानीयसालिका;

गब्भो ओवरको वासा, गारं तु सयनिग्गहं.

२१५. इत्थागारं तु ओरोधो, सुद्धन्तो’ न्तेपुरम्पि च;

असब्बविसयट्ठानं, रञ्ञं कच्छन्तरं मतं.

२१६. सोपानो वा’रोहणञ्च,

निस्सेणी सा, धिरोहिणी;

वातपानं गवक्खो च, जालञ्च सीहपञ्जरं.

२१७. आलोकसन्धि वुत्तो थ, लङ्गी’त्थी पलिघो भवे;

कपिसीसो, ग्गलत्थम्भो, निब्बं तु छद्दकोटियं.

२१८. छदनं पटलं छद्द, मजिरं चच्चरो, ङ्गणं;

पघानो पघना, लिन्दो, पमुखं द्वारबन्धनं.

२१९. पिट्ठसङ्घाटकं द्वार, बाहा कूटं तु कण्णिका;

द्वारञ्च पटिहारो थ, उम्मारो देहनी, त्थियं.

२२०. एळको इन्दखीलो थ, थम्भो थूणो पुमित्थियं;

पाटिका, ड्ढेन्दुपासाणे, गिञ्जका तु च इट्ठका.

२२१. वलभिच्छादिदारुम्हि, वङ्के गोपानसी, त्थियं;

कपोतपालिकायं तु, विटङ्को नित्थियं भवे.

२२२. कुञ्चिकाविवरं ताळ, च्छिग्गलो प्यथ कुञ्चिका;

ताळो’वापुरणं चाथ, वेदिका वेदि कथ्यते.

२२३. सङ्घातो पक्खपासो च, मन्दिरङ्गा तुला अपि;

थियं सम्मुज्जनी चेव, सम्मज्जनी च सोधनी.

२२४. सङ्कटीरं तु सङ्कार, ट्ठानं सङ्कारकूटकं;

अथो कचवरो, क्लापो, सङ्कारो च कसम्बुपि.

२२५. घरादिभूमि तं वत्थु, गामो संवसथो थ सो;

पाकटो निगमो भोग, मच्चादिभ्यो धि तूदितो [‘अधिभू’ति ईरितो कथितो (टी.)].

२२६. सीमा च मरियादा थ,

घोसो गोपालगामकोति.

पुरवग्गो निट्ठितो.