236. н̃аттивипаннакамма̄дикатха̄

385. тена кхо пана самайена чхаббаггийа̄ бхиккхӯ еварӯпа̄ни камма̄ни каронти – адхаммена ваггакаммам̣ каронти, адхаммена самаггакаммам̣ каронти; дхаммена ваггакаммам̣ каронти, дхаммапатирӯпакена ваггакаммам̣ каронти, дхаммапатирӯпакена самаггакаммам̣ каронти; н̃аттивипаннампи каммам̣ каронти анусса̄ванасампаннам̣, анусса̄ванавипаннампи каммам̣ каронти н̃аттисампаннам̣, н̃аттивипаннампи анусса̄ванавипаннампи каммам̣ каронти; ан̃н̃атра̄пи дхамма̄ каммам̣ каронти, ан̃н̃атра̄пи винайа̄ каммам̣ каронти, ан̃н̃атра̄пи саттхуса̄сана̄ каммам̣ каронти; пат̣икут̣т̣хакатампи каммам̣ каронти адхаммикам̣ куппам̣ ат̣т̣ха̄на̄рахам̣. йе те бхиккхӯ аппиччха̄…пе… те уджджха̄йанти кхиййанти випа̄ченти – ‘‘катхан̃хи на̄ма чхаббаггийа̄ бхиккхӯ еварӯпа̄ни камма̄ни кариссанти – адхаммена ваггакаммам̣ кариссанти, адхаммена самаггакаммам̣ кариссанти; дхаммена ваггакаммам̣ кариссанти, дхаммапатирӯпакена ваггакаммам̣ кариссанти, дхаммапатирӯпакена самаггакаммам̣ кариссанти; н̃аттивипаннампи каммам̣ кариссанти анусса̄ванасампаннам̣, анусса̄ванавипаннампи каммам̣ кариссанти н̃аттисампаннам̣, н̃аттивипаннампи анусса̄ванавипаннампи каммам̣ кариссанти; ан̃н̃атра̄пи дхамма̄ каммам̣ кариссанти, ан̃н̃атра̄пи винайа̄ каммам̣ кариссанти, ан̃н̃атра̄пи саттхуса̄сана̄ каммам̣ кариссанти; пат̣икут̣т̣хакатампи каммам̣ кариссанти адхаммикам̣ куппам̣ ат̣т̣ха̄на̄раха’’нти. атха кхо те бхиккхӯ бхагавато етаматтхам̣ а̄рочесум̣…пе… ‘‘саччам̣ кира, бхиккхаве, чхаббаггийа̄ бхиккхӯ еварӯпа̄ни камма̄ни каронти – адхаммена ваггакаммам̣ каронти…пе… пат̣икут̣т̣хакатампи каммам̣ каронти адхаммикам̣ куппам̣ ат̣т̣ха̄на̄раха’’нти? ‘‘саччам̣, бхагава̄’’ти. вигарахи буддхо бхагава̄…пе… вигарахитва̄ дхаммим̣ катхам̣ катва̄ бхиккхӯ а̄мантеси –

386. ‘‘адхаммена че, бхиккхаве, ваггакаммам̣ акаммам̣ на ча каран̣ӣйам̣; адхаммена самаггакаммам̣ акаммам̣ на ча каран̣ӣйам̣; дхаммена ваггакаммам̣ акаммам̣ на ча каран̣ӣйам̣; дхаммапатирӯпакена ваггакаммам̣ акаммам̣ на ча каран̣ӣйам̣; дхаммапатирӯпакена самаггакаммам̣ акаммам̣ на ча каран̣ӣйам̣. н̃аттивипаннан̃че, бхиккхаве, каммам̣ анусса̄ванасампаннам̣ акаммам̣ на ча каран̣ӣйам̣; анусса̄ванавипаннан̃че, бхиккхаве, каммам̣ н̃аттисампаннам̣ акаммам̣ на ча каран̣ӣйам̣; н̃аттивипаннан̃че, бхиккхаве, каммам̣ анусса̄ванавипаннам̣ акаммам̣ на ча каран̣ӣйам̣; ан̃н̃атра̄пи дхамма̄ каммам̣ акаммам̣ на ча каран̣ӣйам̣; ан̃н̃атра̄пи винайа̄ каммам̣ акаммам̣ на ча каран̣ӣйам̣; ан̃н̃атра̄пи саттхуса̄сана̄ каммам̣ акаммам̣ на ча каран̣ӣйам̣; пат̣икут̣т̣хакатан̃че, бхиккхаве, каммам̣ адхаммикам̣ куппам̣ ат̣т̣ха̄на̄рахам̣ акаммам̣ на ча каран̣ӣйам̣.

387. чхайима̄ни, бхиккхаве, камма̄ни – адхаммакаммам̣, ваггакаммам̣, самаггакаммам̣, дхаммапатирӯпакена ваггакаммам̣, дхаммапатирӯпакена самаггакаммам̣, дхаммена самаггакаммам̣.

катаман̃ча, бхиккхаве, адхаммакаммам̣? н̃аттидутийе че, бхиккхаве, камме ека̄йа н̃аттийа̄ каммам̣ кароти, на ча каммава̄чам̣ анусса̄вети – адхаммакаммам̣. н̃аттидутийе че, бхиккхаве, камме двӣхи н̃аттӣхи каммам̣ кароти, на ча каммава̄чам̣ анусса̄вети – адхаммакаммам̣. н̃аттидутийе че, бхиккхаве, камме ека̄йа каммава̄ча̄йа каммам̣ кароти, на ча н̃аттим̣ т̣хапети – адхаммакаммам̣. н̃аттидутийе че, бхиккхаве, камме двӣхи каммава̄ча̄хи каммам̣ кароти, на ча н̃аттим̣ т̣хапети – адхаммакаммам̣. н̃аттичатуттхе че, бхиккхаве, камме ека̄йа н̃аттийа̄ каммам̣ кароти, на ча каммава̄чам̣ анусса̄вети – адхаммакаммам̣. н̃аттичатуттхе че, бхиккхаве, камме двӣхи н̃аттӣхи каммам̣ кароти, на ча каммава̄чам̣ анусса̄вети – адхаммакаммам̣. н̃аттичатуттхе че, бхиккхаве, камме тӣхи н̃аттӣхи каммам̣ кароти, на ча каммава̄чам̣ анусса̄вети – адхаммакаммам̣. н̃аттичатуттхе че, бхиккхаве, камме чатӯхи н̃аттӣхи каммам̣ кароти, на ча каммава̄чам̣ анусса̄вети – адхаммакаммам̣. н̃аттичатуттхе че, бхиккхаве, камме ека̄йа каммава̄ча̄йа каммам̣ кароти, на ча н̃аттим̣ т̣хапети – адхаммакаммам̣. н̃аттичатуттхе че, бхиккхаве, камме двӣхи каммава̄ча̄хи каммам̣ кароти, на ча н̃аттим̣ т̣хапети – адхаммакаммам̣. н̃аттичатуттхе че, бхиккхаве, камме тӣхи каммава̄ча̄хи каммам̣ кароти, на ча н̃аттим̣ т̣хапети – адхаммакаммам̣. н̃аттичатуттхе че, бхиккхаве, камме чатӯхи каммава̄ча̄хи каммам̣ кароти, на ча н̃аттим̣ т̣хапети – адхаммакаммам̣. идам̣ вуччати, бхиккхаве, адхаммакаммам̣.

катаман̃ча, бхиккхаве, ваггакаммам̣? н̃аттидутийе че, бхиккхаве, камме йа̄ватика̄ бхиккхӯ каммаппатта̄ те ана̄гата̄ хонти, чханда̄раха̄нам̣ чхандо ана̄хат̣о хоти, саммукхӣбхӯта̄ пат̣иккосанти – ваггакаммам̣. н̃аттидутийе че, бхиккхаве, камме йа̄ватика̄ бхиккхӯ каммаппатта̄ те а̄гата̄ хонти, чханда̄раха̄нам̣ чхандо ана̄хат̣о хоти, саммукхӣбхӯта̄ пат̣иккосанти – ваггакаммам̣. н̃аттидутийе че, бхиккхаве, камме йа̄ватика̄ бхиккхӯ каммаппатта̄ те а̄гата̄ хонти, чханда̄раха̄нам̣ чхандо а̄хат̣о хоти, саммукхӣбхӯта̄ пат̣иккосанти – ваггакаммам̣. н̃аттичатуттхе че, бхиккхаве, камме йа̄ватика̄ бхиккхӯ каммаппатта̄ те ана̄гата̄ хонти, чханда̄раха̄нам̣ чхандо ана̄хат̣о хоти, саммукхӣбхӯта̄ пат̣иккосанти – ваггакаммам̣. н̃аттичатуттхе че, бхиккхаве, камме йа̄ватика̄ бхиккхӯ каммаппатта̄ те а̄гата̄ хонти, чханда̄раха̄нам̣ чхандо ана̄хат̣о хоти, саммукхӣбхӯта̄ пат̣иккосанти – ваггакаммам̣. н̃аттичатуттхе че, бхиккхаве, камме йа̄ватика̄ бхиккхӯ каммаппатта̄ те а̄гата̄ хонти, чханда̄раха̄нам̣ чхандо а̄хат̣о хоти, саммукхӣбхӯта̄ пат̣иккосанти – ваггакаммам̣. идам̣ вуччати, бхиккхаве, ваггакаммам̣.

катаман̃ча, бхиккхаве, самаггакаммам̣? н̃аттидутийе че, бхиккхаве, камме йа̄ватика̄ бхиккхӯ каммаппатта̄, те а̄гата̄ хонти, чханда̄раха̄нам̣ чхандо а̄хат̣о хоти, саммукхӣбхӯта̄ на пат̣иккосанти – самаггакаммам̣. н̃аттичатуттхе че, бхиккхаве, камме йа̄ватика̄ бхиккхӯ каммаппатта̄, те а̄гата̄ хонти, чханда̄раха̄нам̣ чхандо а̄хат̣о хоти, саммукхӣбхӯта̄ на пат̣иккосанти – самаггакаммам̣. идам̣ вуччати, бхиккхаве, самаггакаммам̣.

катаман̃ча, бхиккхаве, дхаммапатирӯпакена ваггакаммам̣? н̃аттидутийе че, бхиккхаве, камме пат̣хамам̣ каммава̄чам̣ анусса̄вети, паччха̄ н̃аттим̣ т̣хапети, йа̄ватика̄ бхиккхӯ каммаппатта̄ те ана̄гата̄ хонти, чханда̄раха̄нам̣ чхандо ана̄хат̣о хоти, саммукхӣбхӯта̄ пат̣иккосанти – дхаммапатирӯпакена ваггакаммам̣. н̃аттидутийе че, бхиккхаве, камме пат̣хамам̣ каммава̄чам̣ анусса̄вети, паччха̄ н̃аттим̣ т̣хапети, йа̄ватика̄ бхиккхӯ каммаппатта̄ те а̄гата̄ хонти, чханда̄раха̄нам̣ чхандо ана̄хат̣о хоти, саммукхӣбхӯта̄ пат̣иккосанти – дхаммапатирӯпакена ваггакаммам̣. н̃аттидутийе че, бхиккхаве, камме пат̣хамам̣ каммава̄чам̣ анусса̄вети, паччха̄ н̃аттим̣ т̣хапети, йа̄ватика̄ бхиккхӯ каммаппатта̄ те а̄гата̄ хонти, чханда̄раха̄нам̣ чхандо а̄хат̣о хоти, саммукхӣбхӯта̄ пат̣иккосанти – дхаммапатирӯпакена ваггакаммам̣. н̃аттичатуттхе че, бхиккхаве, камме пат̣хамам̣ каммава̄чам̣ анусса̄вети, паччха̄ н̃аттим̣ т̣хапети, йа̄ватика̄ бхиккхӯ каммаппатта̄ те ана̄гата̄ хонти, чханда̄раха̄нам̣ чхандо ана̄хат̣о хоти, саммукхӣбхӯта̄ пат̣иккосанти – дхаммапатирӯпакена ваггакаммам̣. н̃аттичатуттхе че, бхиккхаве, камме пат̣хамам̣ каммава̄чам̣ анусса̄вети, паччха̄ н̃аттим̣ т̣хапети, йа̄ватика̄ бхиккхӯ каммаппатта̄ те а̄гата̄ хонти, чханда̄раха̄нам̣ чхандо ана̄хат̣о хоти, саммукхӣбхӯта̄ пат̣иккосанти – дхаммапатирӯпакена ваггакаммам̣. н̃аттичатуттхе че, бхиккхаве, камме пат̣хамам̣ каммава̄чам̣ анусса̄вети, паччха̄ н̃аттим̣ т̣хапети, йа̄ватика̄ бхиккхӯ каммаппатта̄ те а̄гата̄ хонти, чханда̄раха̄нам̣ чхандо а̄хат̣о хоти, саммукхӣбхӯта̄ пат̣иккосанти – дхаммапатирӯпакена ваггакаммам̣. идам̣ вуччати, бхиккхаве, дхаммапатирӯпакена ваггакаммам̣.

катаман̃ча, бхиккхаве, дхаммапатирӯпакена самаггакаммам̣? н̃аттидутийе че, бхиккхаве, камме пат̣хамам̣ каммава̄чам̣ анусса̄вети, паччха̄ н̃аттим̣ т̣хапети, йа̄ватика̄ бхиккхӯ каммаппатта̄, те а̄гата̄ хонти, чханда̄раха̄нам̣ чхандо а̄хат̣о хоти, саммукхӣбхӯта̄ на пат̣иккосанти – дхаммапатирӯпакена самаггакаммам̣. н̃аттичатуттхе че, бхиккхаве, камме пат̣хамам̣ каммава̄чам̣ анусса̄вети, паччха̄ н̃аттим̣ т̣хапети, йа̄ватика̄ бхиккхӯ каммаппатта̄ те а̄гата̄ хонти, чханда̄раха̄нам̣ чхандо а̄хат̣о хоти, саммукхӣбхӯта̄ на пат̣иккосанти – дхаммапатирӯпакена самаггакаммам̣. идам̣ вуччати, бхиккхаве, дхаммапатирӯпакена самаггакаммам̣.

катаман̃ча, бхиккхаве, дхаммена самаггакаммам̣? н̃аттидутийе че, бхиккхаве, камме пат̣хамам̣ н̃аттим̣ т̣хапети, паччха̄ ека̄йа каммава̄ча̄йа каммам̣ кароти, йа̄ватика̄ бхиккхӯ каммаппатта̄ те а̄гата̄ хонти, чханда̄раха̄нам̣ чхандо а̄хат̣о хоти, саммукхӣбхӯта̄ на пат̣иккосанти – дхаммена самаггакаммам̣. н̃аттичатуттхе че, бхиккхаве, камме пат̣хамам̣ н̃аттим̣ т̣хапети, паччха̄ тӣхи каммава̄ча̄хи каммам̣ кароти, йа̄ватика̄ бхиккхӯ каммаппатта̄, те а̄гата̄ хонти, чханда̄раха̄нам̣ чхандо а̄хат̣о хоти, саммукхӣбхӯта̄ на пат̣иккосанти, дхаммена самаггакаммам̣. идам̣ вуччати, бхиккхаве, дхаммена самаггакаммам̣.

н̃аттивипаннакамма̄дикатха̄ нит̣т̣хита̄.