235. адхаммена вагга̄дикаммакатха̄

382. тена кхо пана самайена чампа̄йам̣ бхиккхӯ еварӯпа̄ни камма̄ни каронти – адхаммена ваггакаммам̣ каронти, адхаммена самаггакаммам̣ каронти; дхаммена ваггакаммам̣ каронти, дхаммапатирӯпакена ваггакаммам̣ каронти; дхаммапатирӯпакена самаггакаммам̣ каронти; екопи екам̣ уккхипати, екопи две уккхипати, екопи самбахуле уккхипати, екопи сан̇гхам̣ уккхипати; двепи екам̣ уккхипанти, двепи две уккхипанти, двепи самбахуле уккхипанти, двепи сан̇гхам̣ уккхипанти; самбахула̄пи екам̣ уккхипанти; самбахула̄пи две уккхипанти, самбахула̄пи самбахуле уккхипанти, самбахула̄пи сан̇гхам̣ уккхипанти; сан̇гхопи сан̇гхам̣ уккхипати. йе те бхиккхӯ аппиччха̄…пе… те уджджха̄йанти кхиййанти випа̄ченти – ‘‘катхан̃хи на̄ма чампа̄йам̣ бхиккхӯ еварӯпа̄ни камма̄ни кариссанти – адхаммена ваггакаммам̣ кариссанти, адхаммена самаггакаммам̣ кариссанти, дхаммена ваггакаммам̣ кариссанти, дхаммапатирӯпакена ваггакаммам̣ кариссанти, дхаммапатирӯпакена самаггакаммам̣ кариссанти, екопи екам̣ уккхиписсати, екопи две уккхиписсати, екопи самбахуле уккхиписсати, екопи сан̇гхам̣ уккхиписсати, двепи екам̣ уккхиписсанти, двепи две уккхиписсанти, двепи самбахуле уккхиписсанти, двепи сан̇гхам̣ уккхиписсанти, самбахула̄пи екам̣ уккхиписсанти, самбахула̄пи две уккхиписсанти, самбахула̄пи самбахуле уккхиписсанти, самбахула̄пи сан̇гхам̣ уккхиписсанти, сан̇гхопи сан̇гхам̣ уккхиписсатӣ’’ти. атха кхо те бхиккхӯ бхагавато етаматтхам̣ а̄рочесум̣…пе… ‘‘саччам̣ кира, бхиккхаве, чампа̄йам̣ бхиккхӯ еварӯпа̄ни камма̄ни каронти – адхаммена ваггакаммам̣ каронти…пе… сан̇гхопи сан̇гхам̣ уккхипатӣ’’ти? ‘‘саччам̣, бхагава̄’’ти. вигарахи буддхо бхагава̄ – ‘‘анануччхавикам̣, бхиккхаве, тесам̣ могхапуриса̄нам̣ анануломикам̣ аппатирӯпам̣ асса̄ман̣акам̣ акаппийам̣ акаран̣ӣйам̣. катхан̃хи на̄ма те, бхиккхаве, могхапуриса̄ еварӯпа̄ни камма̄ни кариссанти – адхаммена ваггакаммам̣ кариссанти…пе… сан̇гхопи сан̇гхам̣ уккхиписсати. нетам̣, бхиккхаве, аппасанна̄нам̣ ва̄ паса̄да̄йа…пе… вигарахитва̄…пе… дхаммим̣ катхам̣ катва̄ бхиккхӯ а̄мантеси –

383. ‘‘адхаммена че, бхиккхаве, ваггакаммам̣ акаммам̣ на ча каран̣ӣйам̣, адхаммена [адхаммена че бхиккхаве (сйа̄.)] самаггакаммам̣ акаммам̣ на ча каран̣ӣйам̣, дхаммена ваггакаммам̣ акаммам̣ на ча каран̣ӣйам̣; дхаммапатирӯпакена ваггакаммам̣ акаммам̣ на ча каран̣ӣйам̣, дхаммапатирӯпакена самаггакаммам̣ акаммам̣ на ча каран̣ӣйам̣; екопи екам̣ уккхипати акаммам̣ на ча каран̣ӣйам̣, екопи две уккхипати акаммам̣ на ча каран̣ӣйам̣, екопи самбахуле уккхипати акаммам̣ на ча каран̣ӣйам̣, екопи сан̇гхам̣ уккхипати акаммам̣ на ча каран̣ӣйам̣; двепи екам̣ уккхипанти акаммам̣ на ча каран̣ӣйам̣, двепи две уккхипанти акаммам̣ на ча каран̣ӣйам̣, двепи самбахуле уккхипанти акаммам̣ на ча каран̣ӣйам̣, двепи сан̇гхам̣ уккхипанти акаммам̣ на ча каран̣ӣйам̣; самбахула̄пи екам̣ уккхипанти акаммам̣ на ча каран̣ӣйам̣, самбахула̄пи две уккхипанти акаммам̣ на ча каран̣ӣйам̣, самбахула̄пи самбахуле уккхипанти акаммам̣ на ча каран̣ӣйам̣, самбахула̄пи сан̇гхам̣ уккхипанти акаммам̣ на ча каран̣ӣйам̣; сан̇гхопи сан̇гхам̣ уккхипати акаммам̣ на ча каран̣ӣйам̣.

384. ‘‘чатта̄рима̄ни, бхиккхаве, камма̄ни – адхаммена ваггакаммам̣, адхаммена самаггакаммам̣, дхаммена ваггакаммам̣, дхаммена самаггакаммам̣. татра, бхиккхаве, йадидам̣ адхаммена ваггакаммам̣, идам̣, бхиккхаве, каммам̣ адхамматта̄ ваггатта̄ куппам̣ ат̣т̣ха̄на̄рахам̣; на, бхиккхаве, еварӯпам̣ каммам̣ ка̄таббам̣, на ча майа̄ еварӯпам̣ каммам̣ анун̃н̃а̄там̣. татра, бхиккхаве, йадидам̣ адхаммена самаггакаммам̣, идам̣, бхиккхаве, каммам̣ адхамматта̄ куппам̣ ат̣т̣ха̄на̄рахам̣; на, бхиккхаве, еварӯпам̣ каммам̣ ка̄таббам̣, на ча майа̄ еварӯпам̣ каммам̣ анун̃н̃а̄там̣. татра, бхиккхаве, йадидам̣ дхаммена ваггакаммам̣, идам̣, бхиккхаве, каммам̣ ваггатта̄ куппам̣ ат̣т̣ха̄на̄рахам̣; на, бхиккхаве, еварӯпам̣ каммам̣ ка̄таббам̣, на ча майа̄ еварӯпам̣ каммам̣ анун̃н̃а̄там̣. татра, бхиккхаве, йадидам̣ дхаммена самаггакаммам̣, идам̣, бхиккхаве, каммам̣ дхамматта̄ самаггатта̄ акуппам̣ т̣ха̄на̄рахам̣; еварӯпам̣, бхиккхаве, каммам̣ ка̄таббам̣, еварӯпан̃ча майа̄ каммам̣ анун̃н̃а̄там̣. тасма̄тиха, бхиккхаве, еварӯпам̣ каммам̣ карисса̄ма йадидам̣ дхаммена самагганти – еван̃хи во, бхиккхаве, сиккхитабба’’нти.

адхаммена вагга̄дикаммакатха̄ нит̣т̣хита̄.