223. упанандасакйапуттаваттху

364. тена кхо пана самайена а̄йасма̄ упанандо сакйапутто са̄ваттхийам̣ вассам̣вут̣т̣хо ан̃н̃атарам̣ га̄мака̄ва̄сам̣ агама̄си. таттха ча бхиккхӯ чӣварам̣ бха̄джетука̄ма̄ саннипатим̣су. те евама̄хам̣су – ‘‘има̄ни кхо, а̄вусо, сан̇гхика̄ни чӣвара̄ни бха̄джийиссанти, са̄дийиссаси бха̄га’’нти? ‘‘а̄ма̄вусо, са̄дийисса̄мӣ’’ти. тато чӣварабха̄гам̣ гахетва̄ ан̃н̃ам̣ а̄ва̄сам̣ агама̄си. таттхапи бхиккхӯ чӣварам̣ бха̄джетука̄ма̄ саннипатим̣су. тепи евама̄хам̣су – ‘‘има̄ни кхо, а̄вусо, сан̇гхика̄ни чӣвара̄ни бха̄джийиссанти, са̄дийиссаси бха̄га’’нти? ‘‘а̄ма̄вусо, са̄дийисса̄мӣ’’ти. татопи чӣварабха̄гам̣ гахетва̄ ан̃н̃ам̣ а̄ва̄сам̣ агама̄си. таттхапи бхиккхӯ чӣварам̣ бха̄джетука̄ма̄ саннипатим̣су. тепи евама̄хам̣су – ‘‘има̄ни кхо, а̄вусо, сан̇гхика̄ни чӣвара̄ни бха̄джийиссанти, са̄дийиссаси бха̄га’’нти? ‘‘а̄ма̄вусо, са̄дийисса̄мӣ’’ти. татопи чӣварабха̄гам̣ гахетва̄ махантам̣ чӣварабхан̣д̣икам̣ а̄да̄йа пунадева са̄ваттхим̣ пачча̄ган̃чхи. бхиккхӯ евама̄хам̣су – ‘‘маха̄пун̃н̃оси твам̣, а̄вусо упананда, бахум̣ те чӣварам̣ уппанна’’нти. ‘‘куто ме, а̄вусо, пун̃н̃ам̣? идха̄хам̣, а̄вусо, са̄ваттхийам̣ вассам̣вут̣т̣хо ан̃н̃атарам̣ га̄мака̄ва̄сам̣ агама̄сим̣. таттха бхиккхӯ чӣварам̣ бха̄джетука̄ма̄ саннипатим̣су. те мам̣ евама̄хам̣су – ‘има̄ни кхо, а̄вусо, сан̇гхика̄ни чӣвара̄ни бха̄джийиссанти, са̄дийиссаси бха̄га’нти? ‘а̄ма̄вусо, са̄дийисса̄мӣ’ти. тато чӣварабха̄гам̣ гахетва̄ ан̃н̃ам̣ а̄ва̄сам̣ агама̄сим̣. таттхапи бхиккхӯ чӣварам̣ бха̄джетука̄ма̄ саннипатим̣су. тепи мам̣ евама̄хам̣су – ‘има̄ни кхо, а̄вусо, сан̇гхика̄ни чӣвара̄ни бха̄джийиссанти, са̄дийиссаси бха̄га’’’нти? ‘а̄ма̄вусо, са̄дийисса̄мӣ’ти. татопи чӣварабха̄гам̣ гахетва̄ ан̃н̃ам̣ а̄ва̄сам̣ агама̄сим̣. таттхапи бхиккхӯ чӣварам̣ бха̄джетука̄ма̄ саннипатим̣су. тепи мам̣ евама̄хам̣су – ‘има̄ни кхо, а̄вусо, сан̇гхика̄ни чӣвара̄ни бха̄джийиссанти, са̄дийиссаси бха̄га’нти? ‘а̄ма̄вусо, са̄дийисса̄мӣ’ти. татопи чӣварабха̄гам̣ аггахесим̣. евам̣ ме бахум̣ чӣварам̣ уппаннанти. ‘‘ким̣ пана твам̣, а̄вусо упананда, ан̃н̃атра вассам̣вут̣т̣хо ан̃н̃атра чӣварабха̄гам̣ са̄дийӣ’’ти? ‘‘евама̄вусо’’ти. йе те бхиккхӯ аппиччха̄…пе… те уджджха̄йанти кхиййанти випа̄ченти – ‘‘катхан̃хи на̄ма а̄йасма̄ упанандо сакйапутто ан̃н̃атра вассам̣вут̣т̣хо ан̃н̃атра чӣварабха̄гам̣ са̄дийиссатӣ’’ти. бхагавато етаматтхам̣ а̄рочесум̣…пе… ‘‘саччам̣ кира твам̣, упананда, ан̃н̃атра вассам̣вут̣т̣хо ан̃н̃атра чӣварабха̄гам̣ са̄дийӣ’’ти? ‘‘саччам̣ бхагава̄’’ти. вигарахи буддхо бхагава̄…пе… катхан̃хи на̄ма твам̣, могхапуриса, ан̃н̃атра вассам̣вут̣т̣хо ан̃н̃атра чӣварабха̄гам̣ са̄дийиссаси. нетам̣, могхапуриса, аппасанна̄нам̣ ва̄ паса̄да̄йа…пе… вигарахитва̄…пе… дхаммим̣ катхам̣ катва̄ бхиккхӯ а̄мантеси – ‘‘на, бхиккхаве, ан̃н̃атра вассам̣вут̣т̣хена ан̃н̃атра чӣварабха̄го са̄дитаббо. йо са̄дийеййа, а̄патти дуккат̣асса̄’’ти.

тена кхо пана самайена а̄йасма̄ упанандо сакйапутто еко двӣсу а̄ва̄сесу вассам̣ васи – ‘‘евам̣ ме бахум̣ чӣварам̣ уппаджджиссатӣ’’ти. атха кхо тесам̣ бхиккхӯнам̣ етадахоси – ‘‘катхам̣ ну кхо а̄йасмато упанандасса сакйапуттасса чӣварапат̣ивӣсо да̄таббо’’ти? бхагавато етаматтхам̣ а̄рочесум̣. детха, бхиккхаве, могхапурисасса ека̄дхиппа̄йам̣. идха пана, бхиккхаве, бхиккху еко двӣсу а̄ва̄сесу вассам̣ васати – ‘‘евам̣ ме бахум̣ чӣварам̣ уппаджджиссатӣ’’ти. саче амутра упад̣д̣хам̣ амутра упад̣д̣хам̣ васати, амутра упад̣д̣хо амутра упад̣д̣хо чӣварапат̣ивӣсо да̄таббо. йаттха ва̄ пана бахутарам̣ васати, тато чӣварапат̣ивӣсо да̄табботи.

упанандасакйапуттаваттху нит̣т̣хитам̣.