218. атирекачӣваракатха̄

347. [па̄ра̄. 461] тена кхо пана самайена чхаббаггийа̄ бхиккхӯ бхагавата̄ тичӣварам̣ анун̃н̃а̄танти ан̃н̃енева тичӣварена га̄мам̣ пависанти, ан̃н̃ена тичӣварена а̄ра̄ме аччханти, ан̃н̃ена тичӣварена наха̄нам̣ отаранти. йе те бхиккхӯ аппиччха̄ те уджджха̄йанти кхиййанти випа̄ченти – ‘‘катхан̃хи на̄ма чхаббаггийа̄ бхиккхӯ атирекачӣварам̣ дха̄рессантӣ’’ти. атха кхо те бхиккхӯ бхагавато етаматтхам̣ а̄рочесум̣. атха кхо бхагава̄ етасмим̣ нида̄не етасмим̣ пакаран̣е дхаммим̣ катхам̣ катва̄ бхиккхӯ а̄мантеси – ‘‘на, бхиккхаве, атирекачӣварам̣ дха̄ретаббам̣. йо дха̄реййа, йатха̄дхаммо ка̄ретаббо’’ти.

[па̄ра̄. 461] тена кхо пана самайена а̄йасмато а̄нандасса атирекачӣварам̣ уппаннам̣ хоти. а̄йасма̄ ча а̄нандо там̣ чӣварам̣ а̄йасмато са̄рипуттасса да̄тука̄мо хоти. а̄йасма̄ ча са̄рипутто са̄кете вихарати. атха кхо а̄йасмато а̄нандасса етадахоси – ‘‘бхагавата̄ сиккха̄падам̣ пан̃н̃аттам̣ ‘на атирекачӣварам̣ дха̄ретабба’нти. идан̃ча ме атирекачӣварам̣ уппаннам̣. ахан̃чимам̣ чӣварам̣ а̄йасмато са̄рипуттасса да̄тука̄мо. а̄йасма̄ ча са̄рипутто са̄кете вихарати. катхам̣ ну кхо майа̄ пат̣ипаджджитабба’’нти? бхагавато етаматтхам̣ а̄рочеси. ‘‘кӣвачирам̣ пана̄нанда, са̄рипутто а̄гаччхиссатӣ’’ти? ‘‘навамам̣ ва̄, бхагава̄, дивасам̣, дасамам̣ ва̄’’ти. атха кхо бхагава̄ етасмим̣ нида̄не етасмим̣ пакаран̣е дхаммим̣ катхам̣ катва̄ бхиккхӯ а̄мантеси – ‘‘ануджа̄на̄ми, бхиккхаве, даса̄хапарамам̣ атирекачӣварам̣ дха̄рету’’нти.

тена кхо пана самайена бхиккхӯнам̣ атирекачӣварам̣ уппаннам̣ хоти. атха кхо бхиккхӯнам̣ етадахоси – ‘‘катхам̣ ну кхо амхехи атирекачӣваре пат̣ипаджджитабба’’нти? бхагавато етаматтхам̣ а̄рочесум̣. ануджа̄на̄ми, бхиккхаве, атирекачӣварам̣ викаппетунти.

348. атха кхо бхагава̄ веса̄лийам̣ йатха̄бхирантам̣ вихаритва̄ йена ба̄ра̄н̣асӣ тена ча̄рикам̣ пакка̄ми. анупуббена ча̄рикам̣ чарама̄но йена ба̄ра̄н̣асӣ тадавасари. татра судам̣ бхагава̄ ба̄ра̄н̣асийам̣ вихарати исипатане мигада̄йе. тена кхо пана самайена ан̃н̃атарасса бхиккхуно антарава̄сако чхиддо хоти. атха кхо тасса бхиккхуно етадахоси – ‘‘бхагавата̄ тичӣварам̣ анун̃н̃а̄там̣ – дигун̣а̄ сан̇гха̄т̣и, екаччийо уттара̄сан̇го, екаччийо антарава̄сако. айан̃ча ме антарава̄сако чхиддо. йам̣нӯна̄хам̣ аггал̣ам̣ аччхупеййам̣, самантато дупат̣т̣ам̣ бхависсати, маджджхе екаччийа’’нти. атха кхо со бхиккху аггал̣ам̣ аччхупеси. аддаса̄ кхо бхагава̄ сена̄санача̄рикам̣ а̄хин̣д̣анто там̣ бхиккхум̣ аггал̣ам̣ аччхупентам̣ [аччхупантам̣ (ка.)], дисва̄на йена со бхиккху тенупасан̇ками, упасан̇камитва̄ там̣ бхиккхум̣ етадавоча – ‘‘ким̣ твам̣, бхиккху, каросӣ’’ти? ‘‘аггал̣ам̣, бхагава̄, аччхупемӣ’’ти. ‘‘са̄дху са̄дху, бхиккху; са̄дху кхо твам̣, бхиккху, аггал̣ам̣ аччхупесӣ’’ти. атха кхо бхагава̄ етасмим̣ нида̄не етасмим̣ пакаран̣е дхаммим̣ катхам̣ катва̄ бхиккхӯ а̄мантеси – ‘‘ануджа̄на̄ми, бхиккхаве, ахата̄нам̣ дусса̄нам̣ ахатакаппа̄нам̣ дигун̣ам̣ сан̇гха̄т̣им̣, екаччийам̣ уттара̄сан̇гам̣, екаччийам̣ антарава̄сакам̣; утуддхат̣а̄нам̣ дусса̄нам̣ чатуггун̣ам̣ сан̇гха̄т̣им̣, дигун̣ам̣ уттара̄сан̇гам̣, дигун̣ам̣ антарава̄сакам̣; пам̣сукӯле йа̄вадаттхам̣; па̄пан̣ике усса̄хо каран̣ӣйо. ануджа̄на̄ми, бхиккхаве, аггал̣ам̣ туннам̣ оват̣т̣икам̣ кан̣д̣усакам̣ дал̣хӣкамма’’нти.

атирекачӣваракатха̄ нит̣т̣хита̄.