217. тичӣвара̄нуджа̄нана̄

346. атха кхо бхагава̄ ра̄джагахе йатха̄бхирантам̣ вихаритва̄ йена веса̄лӣ тена ча̄рикам̣ пакка̄ми. аддаса кхо бхагава̄ антара̄ ча ра̄джагахам̣ антара̄ ча веса̄лим̣ аддха̄намаггаппат̣ипанно самбахуле бхиккхӯ чӣварехи уббхан̣д̣ите [уббхан̣д̣ӣкате (сйа̄.)] сӣсепи чӣварабхисим̣ каритва̄ кхандхепи чӣварабхисим̣ каритва̄ кат̣ийа̄пи чӣварабхисим̣ каритва̄ а̄гаччханте, дисва̄на бхагавато етадахоси – ‘‘атилахум̣ кхо име могхапуриса̄ чӣваре ба̄хулла̄йа а̄ватта̄. йам̣нӯна̄хам̣ бхиккхӯнам̣ чӣваре сӣмам̣ бандхеййам̣, марийа̄дам̣ т̣хапеййа’’нти. атха кхо бхагава̄ анупуббена ча̄рикам̣ чарама̄но йена веса̄лӣ тадавасари. татра судам̣ бхагава̄ веса̄лийам̣ вихарати готамаке четийе. тена кхо пана самайена бхагава̄ сӣта̄су хемантика̄су раттӣсу антарат̣т̣хака̄су химапа̄тасамайе раттим̣ аджджхока̄се екачӣваро нисӣди. на бхагавантам̣ сӣтам̣ ахоси. никкханте пат̣хаме йа̄ме сӣтам̣ бхагавантам̣ ахоси. дутийам̣ бхагава̄ чӣварам̣ па̄рупи. на бхагавантам̣ сӣтам̣ ахоси. никкханте маджджхиме йа̄ме сӣтам̣ бхагавантам̣ ахоси. татийам̣ бхагава̄ чӣварам̣ па̄рупи. на бхагавантам̣ сӣтам̣ ахоси. никкханте паччхиме йа̄ме уддхасте арун̣е нандимукхийа̄ раттийа̄ сӣтам̣ бхагавантам̣ ахоси. чатуттхам̣ бхагава̄ чӣварам̣ па̄рупи. на бхагавантам̣ сӣтам̣ ахоси. атха кхо бхагавато етадахоси – ‘‘йепи кхо те кулапутта̄ имасмим̣ дхаммавинайе сӣта̄лука̄ сӣтабхӣрука̄ тепи сакконти тичӣварена йа̄петум̣. йам̣нӯна̄хам̣ бхиккхӯнам̣ чӣваре сӣмам̣ бандхеййам̣, марийа̄дам̣ т̣хапеййам̣, тичӣварам̣ ануджа̄неййа’’нти. атха кхо бхагава̄ етасмим̣ нида̄не етасмим̣ пакаран̣е дхаммим̣ катхам̣ катва̄ бхиккхӯ а̄мантеси – ‘‘идха̄хам̣, бхиккхаве, антара̄ ча ра̄джагахам̣ антара̄ ча веса̄лим̣ аддха̄намаггаппат̣ипанно аддасам̣ самбахуле бхиккхӯ чӣварехи уббхан̣д̣ите сӣсепи чӣварабхисим̣ каритва̄ кхандхепи чӣварабхисим̣ каритва̄ кат̣ийа̄пи чӣварабхисим̣ каритва̄ а̄гаччханте, дисва̄на ме етадахоси – ‘атилахум̣ кхо име могхапуриса̄ чӣваре ба̄хулла̄йа а̄ватта̄. йам̣нӯна̄хам̣ бхиккхӯнам̣ чӣваре сӣмам̣ бандхеййам̣, марийа̄дам̣ т̣хапеййа’нти. идха̄хам̣, бхиккхаве, сӣта̄су хемантика̄су раттӣсу антарат̣т̣хака̄су химапа̄тасамайе раттим̣ аджджхока̄се екачӣваро нисӣдим̣. на мам̣ сӣтам̣ ахоси. никкханте пат̣хаме йа̄ме сӣтам̣ мам̣ ахоси. дутийа̄хам̣ чӣварам̣ па̄рупим̣. на мам̣ сӣтам̣ ахоси. никкханте маджджхиме йа̄ме сӣтам̣ мам̣ ахоси. татийа̄хам̣ чӣварам̣ па̄рупим̣. на мам̣ сӣтам̣ ахоси. никкханте паччхиме йа̄ме уддхасте арун̣е нандимукхийа̄ раттийа̄ сӣтам̣ мам̣ ахоси. чатуттха̄хам̣ чӣварам̣ па̄рупим̣. на мам̣ сӣтам̣ ахоси. тасса майхам̣, бхиккхаве, етадахоси – ‘‘йепи кхо те кулапутта̄ имасмим̣ дхаммавинайе сӣта̄лука̄ сӣтабхӣрука̄ тепи сакконти тичӣварена йа̄петум̣. йам̣нӯна̄хам̣ бхиккхӯнам̣ чӣваре сӣмам̣ бандхеййам̣, марийа̄дам̣ т̣хапеййам̣, тичӣварам̣ ануджа̄неййа’нти. ануджа̄на̄ми, бхиккхаве, тичӣварам̣ – дигун̣ам̣ сан̇гха̄т̣им̣, екаччийам̣ уттара̄сан̇гам̣, екаччийам̣ антарава̄сака’’нти.

тичӣвара̄нуджа̄нана̄ нит̣т̣хита̄.