214. бхан̣д̣а̄га̄расаммутиа̄дикатха̄

343. тена кхо пана самайена чӣваранидахако бхиккху ман̣д̣апепи руккхамӯлепи ниббакосепи чӣварам̣ нидахати, ундӯрехипи упачика̄хипи кхаджджанти. бхагавато етаматтхам̣ а̄рочесум̣. ануджа̄на̄ми, бхиккхаве, бхан̣д̣а̄га̄рам̣ самманнитум̣, йам̣ сан̇гхо а̄кан̇кхати виха̄рам̣ ва̄ ад̣д̣хайогам̣ ва̄ па̄са̄дам̣ ва̄ хаммийам̣ ва̄ гухам̣ ва̄. еван̃ча пана, бхиккхаве, самманнитаббо. бйаттена бхиккхуна̄ пат̣ибалена сан̇гхо н̃а̄петаббо –

‘‘сун̣а̄ту ме, бханте, сан̇гхо. йади сан̇гхасса паттакаллам̣, сан̇гхо иттханна̄мам̣ виха̄рам̣ бхан̣д̣а̄га̄рам̣ самманнеййа. еса̄ н̃атти.

‘‘сун̣а̄ту ме, бханте, сан̇гхо. сан̇гхо иттханна̄мам̣ виха̄рам̣ бхан̣д̣а̄га̄рам̣ самманнати. йасса̄йасмато кхамати иттханна̄масса виха̄расса бхан̣д̣а̄га̄расса саммути, со тун̣хасса; йасса наккхамати, со бха̄сеййа.

‘‘саммато сан̇гхена иттханна̄мо виха̄ро бхан̣д̣а̄га̄рам̣. кхамати сан̇гхасса, тасма̄ тун̣хӣ, еваметам̣ дха̄райа̄мӣ’’ти.

тена кхо пана самайена сан̇гхасса бхан̣д̣а̄га̄ре чӣварам̣ агуттам̣ хоти. бхагавато етаматтхам̣ а̄рочесум̣. ануджа̄на̄ми, бхиккхаве, пан̃чахан̇гехи саманна̄гатам̣ бхиккхум̣ бхан̣д̣а̄га̄рикам̣ самманнитум̣ – йо на чханда̄гатим̣ гаччхеййа, на доса̄гатим̣ гаччхеййа, на моха̄гатим̣ гаччхеййа, на бхайа̄гатим̣ гаччхеййа, гутта̄гуттан̃ча джа̄неййа. еван̃ча пана, бхиккхаве, самманнитаббо. пат̣хамам̣ бхиккху йа̄читаббо; йа̄читва̄ бйаттена бхиккхуна̄ пат̣ибалена сан̇гхо н̃а̄петаббо –

‘‘сун̣а̄ту ме, бханте, сан̇гхо. йади сан̇гхасса паттакаллам̣, сан̇гхо иттханна̄мам̣ бхиккхум̣ бхан̣д̣а̄га̄рикам̣ самманнеййа. еса̄ н̃атти.

‘‘сун̣а̄ту ме, бханте, сан̇гхо. сан̇гхо иттханна̄мам̣ бхиккхум̣ бхан̣д̣а̄га̄рикам̣ самманнати. йасса̄йасмато кхамати иттханна̄масса бхиккхуно бхан̣д̣а̄га̄рикасса саммути, со тун̣хасса; йасса наккхамати, со бха̄сеййа.

‘‘саммато сан̇гхена иттханна̄мо бхиккху бхан̣д̣а̄га̄рико. кхамати сан̇гхасса, тасма̄ тун̣хӣ, еваметам̣ дха̄райа̄мӣ’’ти.

тена кхо пана самайена чхаббаггийа̄ бхиккхӯ бхан̣д̣а̄га̄рикам̣ вут̣т̣ха̄пенти. бхагавато етаматтхам̣ а̄рочесум̣. на, бхиккхаве, бхан̣д̣а̄га̄рико вут̣т̣ха̄петаббо. йо вут̣т̣ха̄пеййа, а̄патти дуккат̣асса̄ти.

тена кхо пана самайена сан̇гхасса бхан̣д̣а̄га̄ре чӣварам̣ уссаннам̣ хоти. бхагавато етаматтхам̣ а̄рочесум̣. ануджа̄на̄ми, бхиккхаве, саммукхӣбхӯтена сан̇гхена бха̄джетунти.

тена кхо пана самайена сан̇гхо чӣварам̣ бха̄дженто кола̄халам̣ ака̄си. бхагавато етаматтхам̣ а̄рочесум̣. ануджа̄на̄ми, бхиккхаве, пан̃чахан̇гехи саманна̄гатам̣ бхиккхум̣ чӣварабха̄джакам̣ самманнитум̣ – йо на чханда̄гатим̣ гаччхеййа, на доса̄гатим̣ гаччхеййа, на моха̄гатим̣ гаччхеййа, на бхайа̄гатим̣ гаччхеййа, бха̄джита̄бха̄джитан̃ча джа̄неййа. еван̃ча пана, бхиккхаве, самманнитаббо. пат̣хамам̣ бхиккху йа̄читаббо; йа̄читва̄ бйаттена бхиккхуна̄ пат̣ибалена сан̇гхо н̃а̄петаббо –

‘‘сун̣а̄ту ме, бханте, сан̇гхо. йади сан̇гхасса паттакаллам̣, сан̇гхо иттханна̄мам̣ бхиккхум̣ чӣварабха̄джакам̣ самманнеййа. еса̄ н̃атти.

‘‘сун̣а̄ту ме, бханте, сан̇гхо. сан̇гхо иттханна̄мам̣ бхиккхум̣ чӣварабха̄джакам̣ самманнати. йасса̄йасмато кхамати иттханна̄масса бхиккхуно чӣварабха̄джакасса саммути, со тун̣хасса; йасса наккхамати, со бха̄сеййа.

‘‘саммато сан̇гхена иттханна̄мо бхиккху чӣварабха̄джако. кхамати сан̇гхасса, тасма̄ тун̣хӣ, еваметам̣ дха̄райа̄мӣ’’ти.

атха кхо чӣварабха̄джака̄нам̣ бхиккхӯнам̣ етадахоси – ‘‘катхам̣ ну кхо чӣварам̣ бха̄джетабба’’нти? бхагавато етаматтхам̣ а̄рочесум̣. ануджа̄на̄ми, бхиккхаве, пат̣хамам̣ уччинитва̄ тулайитва̄ ван̣н̣а̄ван̣н̣ам̣ катва̄ бхиккхӯ ган̣етва̄ ваггам̣ бандхитва̄ чӣварапат̣ивӣсам̣ т̣хапетунти.

атха кхо чӣварабха̄джака̄нам̣ бхиккхӯнам̣ етадахоси – ‘‘катхам̣ ну кхо са̄ман̣ера̄нам̣ чӣварапат̣ивӣсо да̄таббо’’ти? бхагавато етаматтхам̣ а̄рочесум̣. ануджа̄на̄ми, бхиккхаве, са̄ман̣ера̄нам̣ упад̣д̣хапат̣ивӣсам̣ да̄тунти.

тена кхо пана самайена ан̃н̃атаро бхиккху сакена бха̄гена уттаритука̄мо хоти. бхагавато етаматтхам̣ а̄рочесум̣. ануджа̄на̄ми, бхиккхаве, уттарантасса сакам̣ бха̄гам̣ да̄тунти.

тена кхо пана самайена ан̃н̃атаро бхиккху атирекабха̄гена уттаритука̄мо хоти. бхагавато етаматтхам̣ а̄рочесум̣. ануджа̄на̄ми, бхиккхаве, ануккхепе динне атирекабха̄гам̣ да̄тунти.

атха кхо чӣварабха̄джака̄нам̣ бхиккхӯнам̣ етадахоси – ‘‘катхам̣ ну кхо чӣварапат̣ивӣсо да̄таббо, а̄гатапат̣ипа̄т̣ийа̄ [а̄гата̄гатапат̣ипа̄т̣ийа̄ (ка.)] ну кхо уда̄ху йатха̄вуд̣д̣ха’’нти? бхагавато етаматтхам̣ а̄рочесум̣. ануджа̄на̄ми, бхиккхаве, викалаке тосетва̄ кусапа̄там̣ ка̄тунти.

бхан̣д̣а̄га̄расаммутиа̄дикатха̄ нит̣т̣хита̄.