215. чӣварараджанакатха̄

344. тена кхо пана самайена бхиккхӯ чхакан̣енапи пан̣д̣уматтика̄йапи чӣварам̣ раджанти. чӣварам̣ дуббан̣н̣ам̣ хоти. бхагавато етаматтхам̣ а̄рочесум̣. ануджа̄на̄ми, бхиккхаве, чха раджана̄ни – мӯлараджанам̣, кхандхараджанам̣, тачараджанам̣, паттараджанам̣, пуппхараджанам̣, пхалараджананти.

тена кхо пана самайена бхиккхӯ сӣтудака̄йа [сӣтундика̄йа (сӣ.), сӣтӯдака̄йа (сйа̄.)] чӣварам̣ раджанти. чӣварам̣ дуггандхам̣ хоти. бхагавато етаматтхам̣ а̄рочесум̣. ануджа̄на̄ми, бхиккхаве, раджанам̣ пачитум̣ чуллам̣ раджанакумбхинти. раджанам̣ уттарийати. бхагавато етаматтхам̣ а̄рочесум̣. ануджа̄на̄ми, бхиккхаве, уттара̄л̣умпам̣ [уттара̄л̣упам̣ (йоджана̄), уттара̄л̣упам̣ (сйа̄.)] бандхитунти.

тена кхо пана самайена бхиккхӯ на джа̄нанти раджанам̣ паккам̣ ва̄ апаккам̣ ва̄. бхагавато етаматтхам̣ а̄рочесум̣. ануджа̄на̄ми, бхиккхаве, удаке ва̄ накхапит̣т̣хика̄йа ва̄ тхевакам̣ да̄тунти.

тена кхо пана самайена бхиккхӯ раджанам̣ оропента̄ кумбхим̣ а̄вин̃чханти [а̄вин̃джанти (сӣ.), а̄ват̣т̣анти (сйа̄.)]. кумбхӣ бхиджджати. бхагавато етаматтхам̣ а̄рочесум̣. ануджа̄на̄ми, бхиккхаве, раджанул̣ун̇кам̣ [раджана̄л̣ун̇кам̣ (йоджана̄)] дан̣д̣акатха̄лаканти.

тена кхо пана самайена бхиккхӯнам̣ раджанабха̄джанам̣ на сам̣виджджати. бхагавато етаматтхам̣ а̄рочесум̣. ануджа̄на̄ми, бхиккхаве, раджанаколамбам̣ раджанагхат̣анти.

тена кхо пана самайена бхиккхӯ па̄тийа̄пи паттепи чӣварам̣ омадданти. чӣварам̣ парибхиджджати. бхагавато етаматтхам̣ а̄рочесум̣. ануджа̄на̄ми, бхиккхаве, раджанадон̣иканти.

тена кхо пана самайена бхиккхӯ чхама̄йа чӣварам̣ паттхаранти. чӣварам̣ пам̣сукитам̣ хоти. бхагавато етаматтхам̣ а̄рочесум̣. ануджа̄на̄ми, бхиккхаве, тин̣асантха̄раканти.

тин̣асантха̄рако упачика̄хи кхаджджати. бхагавато етаматтхам̣ а̄рочесум̣. ануджа̄на̄ми, бхиккхаве, чӣваравам̣сам̣ чӣварараджджунти.

маджджхена лаггенти. раджанам̣ убхато галати. бхагавато етаматтхам̣ а̄рочесум̣. ануджа̄на̄ми, бхиккхаве, кан̣н̣е бандхитунти.

кан̣н̣о джӣрати. бхагавато етаматтхам̣ а̄рочесум̣. ануджа̄на̄ми, бхиккхаве, кан̣н̣асуттаканти.

раджанам̣ екато галати. бхагавато етаматтхам̣ а̄рочесум̣. ануджа̄на̄ми, бхиккхаве, сампариваттакам̣ сампариваттакам̣ раджетум̣, на ча аччхинне тхеве паккамитунти.

тена кхо пана самайена чӣварам̣ паттхиннам̣ хоти. бхагавато етаматтхам̣ а̄рочесум̣. ануджа̄на̄ми, бхиккхаве, удаке оса̄ретунти.

тена кхо пана самайена чӣварам̣ пхарусам̣ хоти. бхагавато етаматтхам̣ а̄рочесум̣. ануджа̄на̄ми, бхиккхаве, па̄н̣ина̄ а̄кот̣етунти.

тена кхо пана самайена бхиккхӯ аччхиннака̄ни чӣвара̄ни дха̄ренти дантака̄са̄ва̄ни. манусса̄ уджджха̄йанти кхиййанти випа̄ченти – сеййатха̄пи на̄ма [сеййатха̄пи (?)] гихӣ ка̄мабхогиноти. бхагавато етаматтхам̣ а̄рочесум̣. на, бхиккхаве, аччхиннака̄ни чӣвара̄ни дха̄ретабба̄ни. йо дха̄реййа, а̄патти дуккат̣асса̄ти.

чӣварараджанакатха̄ нит̣т̣хита̄.