210. варайа̄чана̄катха̄

337. атха кхо бхагавато ка̄йо начирассева пакататто ахоси. атха кхо джӣвако кома̄рабхаччо там̣ сивеййакам̣ дуссайугам̣ а̄да̄йа йена бхагава̄ тенупасан̇ками, упасан̇камитва̄ бхагавантам̣ абхива̄детва̄ екамантам̣ нисӣди. екамантам̣ нисинно кхо джӣвако кома̄рабхаччо бхагавантам̣ етадавоча – ‘‘ека̄хам̣, бханте, бхагавантам̣ варам̣ йа̄ча̄мӣ’’ти. ‘‘атиккантавара̄ кхо, джӣвака, татха̄гата̄’’ти. ‘‘йан̃ча, бханте, каппати йан̃ча анаваджджа’’нти. ‘‘вадехи, джӣвака̄’’ти. ‘‘бхагава̄, бханте, пам̣сукӯлико, бхиккхусан̇гхо ча. идам̣ ме, бханте, сивеййакам̣ дуссайугам̣ ран̃н̃а̄ паджджотена пахитам̣ – бахӯнам̣ дусса̄нам̣ бахӯнам̣ дуссайуга̄нам̣ бахӯнам̣ дуссайугасата̄нам̣ бахӯнам̣ дуссайугасахасса̄нам̣ бахӯнам̣ дуссайугасатасахасса̄нам̣ агган̃ча сет̣т̣хан̃ча моккхан̃ча уттаман̃ча паваран̃ча. пат̣игган̣ха̄ту ме, бханте, бхагава̄ сивеййакам̣ дуссайугам̣; бхиккхусан̇гхасса ча гахапатичӣварам̣ ануджа̄на̄тӯ’’ти. пат̣иггахеси бхагава̄ сивеййакам̣ дуссайугам̣. атха кхо бхагава̄ джӣвакам̣ кома̄рабхаччам̣ дхаммийа̄ катха̄йа сандассеси сама̄дапеси самуттеджеси сампахам̣сеси. атха кхо джӣвако кома̄рабхаччо бхагавата̄ дхаммийа̄ катха̄йа сандассито сама̄дапито самуттеджито сампахам̣сито ут̣т̣ха̄йа̄сана̄ бхагавантам̣ абхива̄детва̄ падаккхин̣ам̣ катва̄ пакка̄ми. атха кхо бхагава̄ етасмим̣ нида̄не етасмим̣ пакаран̣е дхаммим̣ катхам̣ катва̄ бхиккхӯ а̄мантеси – ‘‘ануджа̄на̄ми, бхиккхаве, гахапатичӣварам̣. йо иччхати, пам̣сукӯлико хоту. йо иччхати, гахапатичӣварам̣ са̄дийату. итарӣтаренапа̄хам̣ [пахам̣ (сӣ.), ча̄хам̣ (сйа̄.)], бхиккхаве, сантут̣т̣хим̣ ван̣н̣емӣ’’ти.

ассосум̣ кхо ра̄джагахе манусса̄ – ‘‘бхагавата̄ кира бхиккхӯнам̣ гахапатичӣварам̣ анун̃н̃а̄та’’нти. те ча манусса̄ хат̣т̣ха̄ ахесум̣ удагга̄ ‘‘ида̄ни кхо майам̣ да̄на̄ни дасса̄ма пун̃н̃а̄ни карисса̄ма, йато бхагавата̄ бхиккхӯнам̣ гахапатичӣварам̣ анун̃н̃а̄та’’нти. ека̄хенева ра̄джагахе бахӯни чӣварасахасса̄ни уппаджджим̣су.

ассосум̣ кхо джа̄напада̄ манусса̄ – ‘‘бхагавата̄ кира бхиккхӯнам̣ гахапатичӣварам̣ анун̃н̃а̄та’’нти. те ча манусса̄ хат̣т̣ха̄ ахесум̣ удагга̄ – ‘‘ида̄ни кхо майам̣ да̄на̄ни дасса̄ма пун̃н̃а̄ни карисса̄ма, йато бхагавата̄ бхиккхӯнам̣ гахапатичӣварам̣ анун̃н̃а̄та’’нти. джанападепи ека̄хенева бахӯни чӣварасахасса̄ни уппаджджим̣су.

тена кхо пана самайена сан̇гхасса па̄ва̄ро уппанно хоти. бхагавато етаматтхам̣ а̄рочесум̣. ануджа̄на̄ми, бхиккхаве, па̄ва̄ранти.

косеййапа̄ва̄ро уппанно хоти. бхагавато етаматтхам̣ а̄рочесум̣. ануджа̄на̄ми, бхиккхаве, косеййапа̄ва̄ранти.

коджавам̣ уппаннам̣ хоти. бхагавато етаматтхам̣ а̄рочесум̣. ануджа̄на̄ми, бхиккхаве, коджаванти.

варайа̄чана̄катха̄ нит̣т̣хита̄.

пат̣хамабха̄н̣ава̄ро нит̣т̣хито.