211. камбала̄нуджа̄нана̄дикатха̄

338. тена кхо пана самайена ка̄сира̄джа̄ джӣвакасса кома̄рабхаччасса ад̣д̣хака̄сикам̣ камбалам̣ па̄хеси упад̣д̣хака̄синам̣ кхамама̄нам̣. атха кхо джӣвако кома̄рабхаччо там̣ ад̣д̣хака̄сикам̣ камбалам̣ а̄да̄йа йена бхагава̄ тенупасан̇ками, упасан̇камитва̄ бхагавантам̣ абхива̄детва̄ екамантам̣ нисӣди. екамантам̣ нисинно кхо джӣвако кома̄рабхаччо бхагавантам̣ етадавоча – ‘‘айам̣ ме, бханте, ад̣д̣хака̄сико камбало ка̄сиран̃н̃а̄ пахито упад̣д̣хака̄синам̣ кхамама̄но. пат̣игган̣ха̄ту ме, бханте, бхагава̄ камбалам̣, йам̣ мамасса дӣгхараттам̣ хита̄йа сукха̄йа̄’’ти. пат̣иггахеси бхагава̄ камбалам̣. атха кхо бхагава̄ джӣвакам̣ кома̄рабхаччам̣ дхаммийа̄ катха̄йа сандассеси…пе… падаккхин̣ам̣ катва̄ пакка̄ми. атха кхо бхагава̄ етасмим̣ нида̄не етасмим̣ пакаран̣е дхаммим̣ катхам̣ катва̄ бхиккхӯ а̄мантеси – ‘‘ануджа̄на̄ми, бхиккхаве, камбала’’нти.

339. тена кхо пана самайена сан̇гхасса учча̄вача̄ни чӣвара̄ни уппанна̄ни хонти. атха кхо бхиккхӯнам̣ етадахоси – ‘‘ким̣ ну кхо бхагавата̄ чӣварам̣ анун̃н̃а̄там̣, ким̣ ананун̃н̃а̄та’’нти? бхагавато етаматтхам̣ а̄рочесум̣. ануджа̄на̄ми, бхиккхаве, чха чӣвара̄ни – кхомам̣ каппа̄сикам̣ косеййам̣ камбалам̣ са̄н̣ам̣ бхан̇ганти.

340. тена кхо пана самайена йе те бхиккхӯ гахапатичӣварам̣ са̄дийанти те куккучча̄йанта̄ пам̣сукӯлам̣ на са̄дийанти – екам̣йева бхагавата̄ чӣварам̣ анун̃н̃а̄там̣, на двети. бхагавато етаматтхам̣ а̄рочесум̣. ануджа̄на̄ми, бхиккхаве, гахапатичӣварам̣ са̄дийантена пам̣сукӯлампи са̄дийитум̣; тадубхайенапа̄хам̣, бхиккхаве, сантут̣т̣хим̣ ван̣н̣емӣти.

камбала̄нуджа̄нана̄дикатха̄ нит̣т̣хита̄.