187. катхина̄нуджа̄нана̄

306. тена самайена буддхо бхагава̄ са̄ваттхийам̣ вихарати джетаване ана̄тхапин̣д̣икасса а̄ра̄ме. тена кхо пана самайена тим̣саматта̄ па̄веййака̄ [па̄т̣хеййака̄ (сӣ. сйа̄.)] бхиккхӯ, саббе а̄ран̃н̃ика̄ саббе пин̣д̣апа̄тика̄ саббе пам̣сукӯлика̄ саббе течӣварика̄ са̄ваттхим̣ а̄гаччханта̄ бхагавантам̣ дассана̄йа упакат̣т̣ха̄йа вассӯпана̄йика̄йа на̄саккхим̣су са̄ваттхийам̣ вассӯпана̄йикам̣ самбха̄ветум̣; антара̄магге са̄кете вассам̣ упагаччхим̣су. те уккан̣т̣хитарӯпа̄ вассам̣ васим̣су – а̄саннева но бхагава̄ вихарати ито чхасу йоджанесу, на ча майам̣ лабха̄ма бхагавантам̣ дассана̄йа̄ти. атха кхо те бхиккхӯ вассам̣вут̣т̣ха̄, тема̄саччайена ката̄йа пава̄ран̣а̄йа, деве вассанте, удакасан̇гахе удакачиккхалле окапун̣н̣ехи чӣварехи килантарӯпа̄ йена са̄ваттхи джетаванам̣ ана̄тхапин̣д̣икасса а̄ра̄мо, йена бхагава̄ тенупасан̇камим̣су; упасан̇камитва̄ бхагавантам̣ абхива̄детва̄ екамантам̣ нисӣдим̣су. а̄чин̣н̣ам̣ кхо панетам̣ буддха̄нам̣ бхагаванта̄нам̣ а̄гантукехи бхиккхӯхи саддхим̣ пат̣исаммодитум̣. атха кхо бхагава̄ те бхиккхӯ етадавоча – ‘‘каччи, бхиккхаве, кхаманӣйам̣, каччи йа̄панӣйам̣, каччи самагга̄ саммодама̄на̄ авивадама̄на̄ пха̄сукам̣ вассам̣ васиттха, на ча пин̣д̣акена киламиттха̄’’ти? ‘‘кхаманӣйам̣, бхагава̄; йа̄панӣйам̣, бхагава̄; самагга̄ ча майам̣, бханте, саммодама̄на̄ авивадама̄на̄ вассам̣ васимха̄, на ча пин̣д̣акена киламимха̄. идха майам̣, бханте, тим̣саматта̄ па̄веййака̄ бхиккхӯ са̄ваттхим̣ а̄гаччханта̄ бхагавантам̣ дассана̄йа упакат̣т̣ха̄йа вассӯпана̄йика̄йа на̄саккхимха̄ са̄ваттхийам̣ вассӯпана̄йикам̣ самбха̄ветум̣, антара̄магге са̄кете вассам̣ упагаччхимха̄. те майам̣, бханте, уккан̣т̣хитарӯпа̄ вассам̣ васимха̄ – ‘а̄саннева но бхагава̄ вихарати ито чхасу йоджанесу, на ча майам̣ лабха̄ма бхагавантам̣ дассана̄йа̄’ти. атха кхо майам̣, бханте, вассам̣вут̣т̣ха̄, тема̄саччайена ката̄йа пава̄ран̣а̄йа, деве вассанте, удакасан̇гахе удакачиккхалле окапун̣н̣ехи чӣварехи килантарӯпа̄ аддха̄нам̣ а̄гата̄ти. атха кхо бхагава̄ етасмим̣ нида̄не етасмим̣ пакаран̣е дхаммим̣ катхам̣ катва̄ бхиккхӯ а̄мантеси – ‘‘ануджа̄на̄ми, бхиккхаве, вассам̣вут̣т̣ха̄нам̣ бхиккхӯнам̣ катхинам̣ [кат̣хинам̣ (сӣ. сйа̄.)] аттхаритум̣. аттхатакатхина̄нам̣ во, бхиккхаве, пан̃ча капписсанти – ана̄мантача̄ро, асама̄да̄нача̄ро, ган̣абходжанам̣, йа̄вадаттхачӣварам̣, йо ча таттха чӣваруппа̄до со несам̣ бхависсатӣти. аттхатакатхина̄нам̣ во, бхиккхаве, има̄ни пан̃ча капписсанти. еван̃ча пана, бхиккхаве, катхинам̣ аттхаритаббам̣. бйаттена бхиккхуна̄ пат̣ибалена сан̇гхо н̃а̄петаббо –

307. ‘‘сун̣а̄ту ме, бханте, сан̇гхо. идам̣ сан̇гхасса катхинадуссам̣ уппаннам̣. йади сан̇гхасса паттакаллам̣, сан̇гхо имам̣ катхинадуссам̣ иттханна̄масса бхиккхуно дадеййа катхинам̣ аттхаритум̣. еса̄ н̃атти.

‘‘сун̣а̄ту ме, бханте, сан̇гхо. идам̣ сан̇гхасса катхинадуссам̣ уппаннам̣. сан̇гхо имам̣ катхинадуссам̣ иттханна̄масса бхиккхуно дети катхинам̣ аттхаритум̣. йасса̄йасмато кхамати имасса катхинадуссасса иттханна̄масса бхиккхуно да̄нам̣ катхинам̣ аттхаритум̣, со тун̣хасса; йасса наккхамати, со бха̄сеййа.

‘‘диннам̣ идам̣ сан̇гхена катхинадуссам̣ иттханна̄масса бхиккхуно катхинам̣ аттхаритум̣. кхамати сан̇гхасса, тасма̄ тун̣хӣ, еваметам̣ дха̄райа̄мӣ’’ти.

308. ‘‘евам̣ кхо, бхиккхаве, аттхатам̣ хоти катхинам̣, евам̣ анаттхатам̣. катхан̃ча пана, бхиккхаве, анаттхатам̣ хоти катхинам̣? на улликхитаматтена аттхатам̣ хоти катхинам̣, на дхованаматтена аттхатам̣ хоти катхинам̣, на чӣваравича̄ран̣аматтена [на ган̣т̣усакаран̣аматтена (ка.)] аттхатам̣ хоти катхинам̣, на чхеданаматтена аттхатам̣ хоти катхинам̣, на бандханаматтена аттхатам̣ хоти катхинам̣, на оват̣т̣ийакаран̣аматтена [на оват̣т̣еййакаран̣аматтена (сӣ. сйа̄.), на овадеййакаран̣аматтена (ка.)] аттхатам̣ хоти катхинам̣, на кан̣д̣усакаран̣аматтена аттхатам̣ хоти катхинам̣, на дал̣хӣкаммакаран̣аматтена аттхатам̣ хоти катхинам̣, на анува̄такаран̣аматтена аттхатам̣ хоти катхинам̣, на парибхан̣д̣акаран̣аматтена аттхатам̣ хоти катхинам̣, на оваддхеййакаран̣аматтена аттхатам̣ хоти катхинам̣, на камбаламадданаматтена аттхатам̣ хоти катхинам̣, на нимиттакатена аттхатам̣ хоти катхинам̣, на парикатха̄катена аттхатам̣ хоти катхинам̣, на куккукатена аттхатам̣ хоти катхинам̣, на саннидхикатена аттхатам̣ хоти катхинам̣, на ниссаггийена аттхатам̣ хоти катхинам̣, на акаппакатена аттхатам̣ хоти катхинам̣, на ан̃н̃атра сан̇гха̄т̣ийа̄ аттхатам̣ хоти катхинам̣, на ан̃н̃атра уттара̄сан̇гена аттхатам̣ хоти катхинам̣, на ан̃н̃атра антарава̄сакена аттхатам̣ хоти катхинам̣, на ан̃н̃атра пан̃чакена ва̄ атирекапан̃чакена ва̄ тадахева сан̃чхиннена саман̣д̣алӣкатена аттхатам̣ хоти катхинам̣, на ан̃н̃атра пуггаласса аттха̄ра̄ аттхатам̣ хоти катхинам̣; самма̄ чева аттхатам̣ хоти катхинам̣, тан̃че ниссӣмат̣т̣хо анумодати, евампи анаттхатам̣ хоти катхинам̣. евам̣ кхо, бхиккхаве, анаттхатам̣ хоти катхинам̣.

309. ‘‘катхан̃ча, бхиккхаве, аттхатам̣ хоти катхинам̣? ахатена аттхатам̣ хоти катхинам̣, ахатакаппена аттхатам̣ хоти катхинам̣, пилотика̄йа аттхатам̣ хоти катхинам̣, пам̣сукӯлена аттхатам̣ хоти катхинам̣, па̄пан̣икена аттхатам̣ хоти катхинам̣, анимиттакатена аттхатам̣ хоти катхинам̣, апарикатха̄катена аттхатам̣ хоти катхинам̣, акуккукатена аттхатам̣ хоти катхинам̣, асаннидхикатена аттхатам̣ хоти катхинам̣, аниссаггийена аттхатам̣ хоти катхинам̣, каппакатена аттхатам̣ хоти катхинам̣, сан̇гха̄т̣ийа̄ аттхатам̣ хоти катхинам̣, уттара̄сан̇гена аттхатам̣ хоти катхинам̣, антарава̄сакена аттхатам̣ хоти катхинам̣, пан̃чакена ва̄ атирекапан̃чакена ва̄ тадахева сан̃чхиннена саман̣д̣алӣкатена аттхатам̣ хоти катхинам̣, пуггаласса аттха̄ра̄ аттхатам̣ хоти катхинам̣; самма̄ че аттхатам̣ хоти катхинам̣, тан̃че сӣмат̣т̣хо анумодати, евампи аттхатам̣ хоти катхинам̣. евам̣ кхо, бхиккхаве, аттхатам̣ хоти катхинам̣.

310. ‘‘катхан̃ча, бхиккхаве, уббхатам̣ хоти катхинам̣? ат̣т̣хима̄, бхиккхаве, ма̄тика̄ катхинасса уббха̄ра̄йа – паккаманантика̄, нит̣т̣ха̄нантика̄, саннит̣т̣ха̄нантика̄, на̄санантика̄, саванантика̄, а̄са̄ваччхедика̄, сӣма̄тиккантика̄, сахуббха̄ра̄’’ти [сауббха̄ра̄ти (ка.)].

катхина̄нуджа̄нана̄ нит̣т̣хита̄.