188. а̄да̄йасаттакам̣

311. бхиккху аттхатакатхино катачӣварам̣ а̄да̄йа паккамати – ‘‘на паччесса’’нти. тасса бхиккхуно паккаманантико катхинуддха̄ро.

бхиккху аттхатакатхино чӣварам̣ а̄да̄йа паккамати. тасса бахисӣмагатасса евам̣ хоти – ‘‘идхевимам̣ чӣварам̣ ка̄рессам̣, на паччесса’’нти. со там̣ чӣварам̣ ка̄рети. тасса бхиккхуно нит̣т̣ха̄нантико катхинуддха̄ро.

бхиккху аттхатакатхино чӣварам̣ а̄да̄йа паккамати. тасса бахисӣмагатасса евам̣ хоти – ‘‘невимам̣ чӣварам̣ ка̄рессам̣, на паччесса’’нти. тасса бхиккхуно саннит̣т̣ха̄нантико катхинуддха̄ро.

бхиккху аттхатакатхино чӣварам̣ а̄да̄йа паккамати. тасса бахисӣмагатасса евам̣ хоти – ‘‘идхевимам̣ чӣварам̣ ка̄рессам̣, на паччесса’’нти. со там̣ чӣварам̣ ка̄рети. тасса там̣ чӣварам̣ кайирама̄нам̣ нассати. тасса бхиккхуно на̄санантико катхинуддха̄ро.

бхиккху аттхатакатхино чӣварам̣ а̄да̄йа паккамати – ‘‘паччесса’’нти. со бахисӣмагато там̣ чӣварам̣ ка̄рети. со катачӣваро сун̣а̄ти ‘‘уббхатам̣ кира тасмим̣ а̄ва̄се катхина’’нти. тасса бхиккхуно саванантико катхинуддха̄ро.

бхиккху аттхатакатхино чӣварам̣ а̄да̄йа паккамати – ‘‘паччесса’’нти. со бахисӣмагато там̣ чӣварам̣ ка̄рети. со катачӣваро – ‘‘паччессам̣ паччесса’’нти – бахиддха̄ катхинуддха̄рам̣ вӣтина̄мети. тасса бхиккхуно сӣма̄тиккантико катхинуддха̄ро.

бхиккху аттхатакатхино чӣварам̣ а̄да̄йа паккамати – ‘‘паччесса’’нти. со бахисӣмагато там̣ чӣварам̣ ка̄рети. со катачӣваро – ‘‘паччессам̣ паччесса’’нти – самбхун̣а̄ти катхинуддха̄рам̣. тасса бхиккхуно саха бхиккхӯхи катхинуддха̄ро.

а̄да̄йасаттакам̣ нит̣т̣хитам̣ […дутийам̣ нит̣т̣хитам̣ (ка.)].