182. кен̣ийаджат̣илаваттху

300. [ма. ни. 2.396 а̄дайо; су. ни. селасуттампи пасситаббам̣] атха кхо бхагава̄ анупуббена ча̄рикам̣ чарама̄но йена а̄пан̣ам̣ тадавасари. ассоси кхо кен̣ийо джат̣ило – ‘‘саман̣о кхалу бхо готамо сакйапутто сакйакула̄ паббаджито а̄пан̣ам̣ ануппатто, там̣ кхо пана бхавантам̣ готамам̣ евам̣ калйа̄н̣о киттисаддо аббхуггато…пе… са̄дху кхо пана татха̄рӯпа̄нам̣ арахатам̣ дассанам̣ хотӣ’’ти. атха кхо кен̣ийасса джат̣иласса етадахоси – ‘‘ким̣ ну кхо ахам̣ саман̣асса готамасса хара̄пеййа’’нти. атха кхо кен̣ийасса джат̣иласса етадахоси – ‘‘йепи кхо те бра̄хман̣а̄нам̣ [айам̣ па̄т̣хо дӣ. ни. 1.285, 526, 536; ма. ни. 2.427; а. ни. 5.191-192 а̄дайо] пуббака̄ исайо манта̄нам̣ катта̄ро манта̄нам̣ паватта̄ро, йесамидам̣ етарахи бра̄хман̣а̄ пора̄н̣ам̣ мантападам̣ гӣтам̣ павуттам̣ самихитам̣, тадануга̄йанти таданубха̄санти, бха̄ситаманубха̄санти, ва̄читаманува̄ченти, сеййатхидам̣ – ат̣т̣хако ва̄мако ва̄мадево весса̄митто йаматагги [йамадагги (ка.)] ан̇гӣрасо бха̄радва̄джо ва̄сет̣т̣хо кассапо бхагу [айам̣ па̄т̣хо дӣ. ни. 1.285, 526, 536; ма. ни. 2.427; а. ни. 5.191-192 а̄дайо], раттӯпарата̄ вирата̄ вика̄лабходжана̄, те еварӯпа̄ни па̄на̄ни са̄дийим̣су. саман̣опи готамо раттӯпарато вирато вика̄лабходжана̄, арахати саман̣опи готамо еварӯпа̄ни па̄на̄ни са̄дийиту’’нти пахӯтам̣ па̄нам̣ пат̣ийа̄да̄петва̄ ка̄джехи га̄ха̄петва̄ йена бхагава̄ тенупасан̇ками; упасан̇камитва̄ бхагавата̄ саддхим̣ саммоди; саммоданӣйам̣ катхам̣ са̄ран̣ӣйам̣ вӣтиса̄ретва̄ екамантам̣ ат̣т̣ха̄си. екамантам̣ т̣хито кхо кен̣ийо джат̣ило бхагавантам̣ етадавоча – ‘‘пат̣игган̣ха̄ту ме бхавам̣ готамо па̄на’’нти. тена хи, кен̣ийа, бхиккхӯнам̣ дехӣти. атха кхо кен̣ийо джат̣ило бхиккхӯнам̣ дети. бхиккхӯ куккучча̄йанта̄ на пат̣игган̣ханти. пат̣игган̣хатха, бхиккхаве, парибхун̃джатха̄ти. атха кхо кен̣ийо джат̣ило буддхаппамукхам̣ бхиккхусан̇гхам̣ пахӯтехи па̄нехи сахаттха̄ сантаппетва̄ сампава̄ретва̄ бхагавантам̣ дхотахаттхам̣ онӣтапаттапа̄н̣им̣ екамантам̣ нисӣди. екамантам̣ нисиннам̣ кхо кен̣ийам̣ джат̣илам̣ бхагава̄ дхаммийа̄ катха̄йа сандассеси сама̄дапеси самуттеджеси сампахам̣сеси. атха кхо кен̣ийо джат̣ило бхагавата̄ дхаммийа̄ катха̄йа сандассито сама̄дапито самуттеджито сампахам̣сито бхагавантам̣ етадавоча – ‘‘адхива̄сету ме бхавам̣ готамо сва̄тана̄йа бхаттам̣ саддхим̣ бхиккхусан̇гхена̄’’ти. маха̄ кхо, кен̣ийа, бхиккхусан̇гхо ад̣д̣хателаса̄ни бхиккхусата̄ни, тван̃ча бра̄хман̣есу абхиппасанноти. дутийампи кхо кен̣ийо джат̣ило бхагавантам̣ етадавоча – ‘‘кин̃ча̄пи кхо, бхо готама, маха̄ бхиккхусан̇гхо ад̣д̣хателаса̄ни бхиккхусата̄ни, ахан̃ча бра̄хман̣есу абхиппасанно, адхива̄сету ме бхавам̣ готамо сва̄тана̄йа бхаттам̣ саддхим̣ бхиккхусан̇гхена̄’’ти. маха̄ кхо, кен̣ийа, бхиккхусан̇гхо ад̣д̣хателаса̄ни бхиккхусата̄ни, тван̃ча бра̄хман̣есу абхиппасанноти. татийампи кхо кен̣ийо джат̣ило бхагавантам̣ етадавоча – ‘‘кин̃ча̄пи кхо, бхо готама, маха̄ бхиккхусан̇гхо ад̣д̣хателаса̄ни бхиккхусата̄ни, ахан̃ча бра̄хман̣есу абхиппасанно, адхива̄сету бхавам̣ готамо сва̄тана̄йа бхаттам̣ саддхим̣ бхиккхусан̇гхена̄’’ти. адхива̄сеси бхагава̄ тун̣хӣбха̄вена. атха кхо кен̣ийо джат̣ило бхагавато адхива̄санам̣ видитва̄ ут̣т̣ха̄йа̄сана̄ пакка̄ми. атха кхо бхагава̄ етасмим̣ нида̄не етасмим̣ пакаран̣е дхаммим̣ катхам̣ катва̄ бхиккхӯ а̄мантеси – ‘‘ануджа̄на̄ми, бхиккхаве, ат̣т̣ха па̄на̄ни – амбапа̄нам̣ джамбупа̄нам̣ чочапа̄нам̣ мочапа̄нам̣ мадхӯкапа̄нам̣ [мадхупа̄нам̣ (сӣ. сйа̄.)] муддикапа̄нам̣ са̄лӯкапа̄нам̣ пха̄русакапа̄нам̣. ануджа̄на̄ми, бхиккхаве, саббам̣ пхаларасам̣ т̣хапетва̄ дхан̃н̃апхаларасам̣. ануджа̄на̄ми, бхиккхаве, саббам̣ паттарасам̣ т̣хапетва̄ д̣а̄карасам̣. ануджа̄на̄ми, бхиккхаве, саббам̣ пуппхарасам̣ т̣хапетва̄ мадхӯкапуппхарасам̣. ануджа̄на̄ми, бхиккхаве, уччхураса’’нти.

атха кхо кен̣ийо джат̣ило тасса̄ раттийа̄ аччайена саке ассаме пан̣ӣтам̣ кха̄данӣйам̣ бходжанӣйам̣ пат̣ийа̄да̄петва̄ бхагавато ка̄лам̣ а̄роча̄песи – ‘‘ка̄ло, бхо готама, нит̣т̣хитам̣ бхатта’’нти. атха кхо бхагава̄ пуббан̣хасамайам̣ нива̄сетва̄ паттачӣварама̄да̄йа йена кен̣ийасса джат̣иласса ассамо тенупасан̇ками; упасан̇камитва̄ пан̃н̃атте а̄сане нисӣди саддхим̣ бхиккхусан̇гхена. атха кхо кен̣ийо джат̣ило буддхаппамукхам̣ бхиккхусан̇гхам̣ пан̣ӣтена кха̄данӣйена бходжанӣйена сахаттха̄ сантаппетва̄ сампава̄ретва̄ бхагавантам̣ бхутта̄вим̣ онӣтапаттапа̄н̣им̣ екамантам̣ нисӣди. екамантам̣ нисиннам̣ кхо кен̣ийам̣ джат̣илам̣ бхагава̄ има̄хи га̄тха̄хи анумоди –

‘‘аггихуттамукха̄ йан̃н̃а̄, са̄виттӣ чхандасо мукхам̣;

ра̄джа̄ мукхам̣ манусса̄нам̣, надӣнам̣ са̄гаро мукхам̣.

‘‘наккхатта̄нам̣ мукхам̣ чандо, а̄диччо тапатам̣ мукхам̣;

пун̃н̃ам̣ а̄кан̇кхама̄на̄нам̣ сан̇гхо, ве йаджатам̣ мукха’’нти.

атха кхо бхагава̄ кен̣ийам̣ джат̣илам̣ има̄хи га̄тха̄хи анумодитва̄ ут̣т̣ха̄йа̄сана̄ пакка̄ми.

кен̣ийаджат̣илаваттху нит̣т̣хитам̣.