183. роджамаллаваттху

301. атха кхо бхагава̄ а̄пан̣е йатха̄бхирантам̣ вихаритва̄ йена кусина̄ра̄ тена ча̄рикам̣ пакка̄ми махата̄ бхиккхусан̇гхена саддхим̣ ад̣д̣хателасехи бхиккхусатехи. ассосум̣ кхо косина̄рака̄ малла̄ – ‘‘бхагава̄ кира кусина̄рам̣ а̄гаччхати махата̄ бхиккхусан̇гхена саддхим̣ ад̣д̣хателасехи бхиккхусатехӣ’’ти. те сан̇гарам̣ [сан̇карам̣ (ка.)] акам̣су – ‘‘йо бхагавато паччуггаманам̣ на кариссати, пан̃часата̄нисса дан̣д̣о’’ти. тена кхо пана самайена роджо малло а̄йасмато а̄нандасса саха̄йо хоти. атха кхо бхагава̄ анупуббена ча̄рикам̣ чарама̄но йена кусина̄ра̄ тадавасари. атха кхо косина̄рака̄ малла̄ бхагавато паччуггаманам̣ акам̣су. атха кхо роджо малло бхагавато паччуггаманам̣ каритва̄ йена̄йасма̄ а̄нандо тенупасан̇ками, упасан̇камитва̄ а̄йасмантам̣ а̄нандам̣ абхива̄детва̄ екамантам̣ ат̣т̣ха̄си. екамантам̣ т̣хитам̣ кхо роджам̣ маллам̣ а̄йасма̄ а̄нандо етадавоча – ‘‘ул̣а̄рам̣ кхо те идам̣, а̄вусо роджа, йам̣ твам̣ бхагавато паччуггаманам̣ ака̄сӣ’’ти. ‘‘на̄хам̣, бханте а̄нанда, бахукато буддхе ва̄ дхамме ва̄ сан̇гхе ва̄; апи ча н̃а̄тӣхи сан̇гаро като – ‘йо бхагавато паччуггаманам̣ на кариссати, пан̃часата̄нисса дан̣д̣о’’’ти; со кхо ахам̣, бханте а̄нанда, н̃а̄тӣнам̣ дан̣д̣абхайа̄ ева̄хам̣ бхагавато паччуггаманам̣ ака̄синти. атха кхо а̄йасма̄ а̄нандо анаттамано ахоси’ катхан̃хи на̄ма роджо малло евам̣ ваккхатӣ’ти? атха кхо а̄йасма̄ а̄нандо йена бхагава̄ тенупасан̇ками, упасан̇камитва̄ бхагавантам̣ абхива̄детва̄ екамантам̣ нисӣди. екамантам̣ нисинно кхо а̄йасма̄ а̄нандо бхагавантам̣ етадавоча – ‘‘айам̣, бханте, роджо малло абхин̃н̃а̄то н̃а̄тамануссо. махаттхико кхо пана еварӯпа̄нам̣ н̃а̄таманусса̄нам̣ имасмим̣ дхаммавинайе паса̄до. са̄дху, бханте, бхагава̄ татха̄ кароту, йатха̄ роджо малло имасмим̣ дхаммавинайе пасӣдеййа̄’’ти. ‘‘на кхо там̣, а̄нанда, дуккарам̣ татха̄гатена, йатха̄ роджо малло имасмим̣ дхаммавинайе пасӣдеййа̄’’ти.

атха кхо бхагава̄ роджам̣ маллам̣ меттена читтена пхаритва̄ ут̣т̣ха̄йа̄сана̄ виха̄рам̣ па̄виси. атха кхо роджо малло бхагавато меттена читтена пхут̣т̣хо, сеййатха̄пи на̄ма га̄вим̣ тарун̣аваччхо, евамева, виха̄рена виха̄рам̣ паривен̣ена паривен̣ам̣ упасан̇камитва̄ бхиккхӯ пуччхати – ‘‘кахам̣ ну кхо, бханте, етарахи со бхагава̄ вихарати арахам̣ самма̄самбуддхо, дассанака̄ма̄ хи майам̣ там̣ бхагавантам̣ арахантам̣ самма̄самбуддха’’нти. ‘‘еса̄вусо роджа, виха̄ро сам̣вутадва̄ро, тена аппасаддо упасан̇камитва̄ атарама̄но а̄л̣индам̣ пависитва̄ укка̄ситва̄ аггал̣ам̣ а̄кот̣ехи, вивариссати те бхагава̄ два̄ра’’нти. атха кхо роджо малло йена со виха̄ро сам̣вутадва̄ро, тена аппасаддо упасан̇камитва̄ атарама̄но а̄л̣индам̣ пависитва̄ укка̄ситва̄ аггал̣ам̣ а̄кот̣еси. вивари бхагава̄ два̄рам̣. атха кхо роджо малло виха̄рам̣ пависитва̄ бхагавантам̣ абхива̄детва̄ екамантам̣ нисӣди. екамантам̣ нисиннасса кхо роджасса малласса бхагава̄ анупуббим̣ катхам̣ катхеси, сеййатхидам̣ – да̄накатхам̣…пе… апараппаччайо саттхуса̄сане бхагавантам̣ етадавоча – ‘‘са̄дху, бханте, аййа̄ маман̃н̃ева пат̣игган̣хеййум̣ чӣварапин̣д̣апа̄тасена̄санагила̄наппаччайабхесаджджапариккха̄рам̣, но ан̃н̃еса’’нти. ‘‘йесам̣ кхо, роджа, секкхена н̃а̄н̣ена секкхена дассанена дхаммо дит̣т̣хо сеййатха̄пи тайа̄, тесампи евам̣ хоти – ‘ахо нӯна аййа̄ амха̄кан̃н̃ева пат̣игган̣хеййум̣ чӣварапин̣д̣апа̄тасена̄санагила̄наппаччайабхесаджджапариккха̄рам̣, но ан̃н̃еса’нти. тена хи, роджа, тава чева пат̣иггахиссанти ан̃н̃есан̃ча̄’’ти.

302. тена кхо пана самайена кусина̄ра̄йам̣ пан̣ӣта̄нам̣ бхатта̄нам̣ бхаттапат̣ипа̄т̣и ат̣т̣хита̄ хоти. атха кхо роджасса малласса пат̣ипа̄т̣им̣ алабхантасса етадахоси – ‘‘йам̣нӯна̄хам̣ бхаттаггам̣ олокеййам̣, йам̣ бхаттагге на̄сса, там̣ пат̣ийа̄деййа’’нти. атха кхо роджо малло бхаттаггам̣ олокенто две на̄ддаса – д̣а̄кан̃ча пит̣т̣хакха̄данӣйан̃ча. атха кхо роджо малло йена̄йасма̄ а̄нандо тенупасан̇ками; упасан̇камитва̄ а̄йасмантам̣ а̄нандам̣ етадавоча – ‘‘идха ме, бханте а̄нанда, пат̣ипа̄т̣им̣ алабхантасса етадахоси – ‘йам̣нӯна̄хам̣ бхаттаггам̣ олокеййам̣, йам̣ бхаттагге на̄сса, там̣ пат̣ийа̄деййа’нти. со кхо ахам̣, бханте а̄нанда, бхаттаггам̣ олокенто две на̄ддасам̣ – д̣а̄кан̃ча пит̣т̣хакха̄данӣйан̃ча. сача̄хам̣, бханте а̄нанда, пат̣ийа̄деййам̣ д̣а̄кан̃ча пит̣т̣хакха̄данӣйан̃ча, пат̣игган̣хеййа ме бхагава̄’’ти? ‘‘тена хи, роджа, бхагавантам̣ пат̣ипуччхисса̄мӣ’’ти. атха кхо а̄йасма̄ а̄нандо бхагавато етаматтхам̣ а̄рочеси. ‘‘тена ха̄нанда, пат̣ийа̄детӯ’’ти. ‘‘тена хи, роджа, пат̣ийа̄дехӣ’’ти. атха кхо роджо малло тасса̄ раттийа̄ аччайена пахӯтам̣ д̣а̄кан̃ча пит̣т̣хакха̄данӣйан̃ча пат̣ийа̄да̄петва̄ бхагавато упана̄меси ‘‘пат̣игган̣ха̄ту ме, бханте, бхагава̄ д̣а̄кан̃ча пит̣т̣хакха̄данӣйан̃ча̄’’ти. ‘‘тена хи, роджа, бхиккхӯнам̣ дехӣ’’ти. атха кхо роджо малло бхиккхӯнам̣ дети. бхиккхӯ куккучча̄йанта̄ на пат̣игган̣ханти. ‘‘пат̣игган̣хатха, бхиккхаве, парибхун̃джатха̄’’ти. атха кхо роджо малло буддхаппамукхам̣ бхиккхусан̇гхам̣ пахӯтехи д̣а̄кехи ча пит̣т̣хакха̄данӣйехи ча сахаттха̄ сантаппетва̄ сампава̄ретва̄ бхагавантам̣ дхотахаттхам̣ онӣтапаттапа̄н̣им̣ екамантам̣ нисӣди. екамантам̣ нисиннам̣ кхо роджам̣ маллам̣ бхагава̄ дхаммийа̄ катха̄йа сандассетва̄ сама̄дапетва̄ самуттеджетва̄ сампахам̣сетва̄ ут̣т̣ха̄йа̄сана̄ пакка̄ми. атха кхо бхагава̄ етасмим̣ нида̄не етасмим̣ пакаран̣е дхаммим̣ катхам̣ катва̄ бхиккхӯ а̄мантеси – ‘‘ануджа̄на̄ми, бхиккхаве, саббан̃ча д̣а̄кам̣ саббан̃ча пит̣т̣хакха̄данӣйа’’нти.

роджамаллаваттху нит̣т̣хитам̣.